ગત ૧ સપ્ટેમ્બરની બપોરે નંદગામ પાસે એચ.પી. પેટ્રોલ પંપ નજીક પડતર જમીન પરથી હર્ષ રાજુભાઈ શર્મા (ઉ.વ. ૩૪)નો માથામાં લોહી નીંગળતી હાલતમાં મૃતદેહ મળી આવ્યો હતો. મરણ જનાર હર્ષ નજીકની ચામુંડા હોટેલમાં મજૂરી કરતો હતો અને હોટેલમાં જ રહેતો જમતો હતો.

નજીક આવેલી ફેક્ટરીમાં કામ કરતો શ્યામકુમારસિંહ હરિહરસિંહ (ઉ.વ. ૪૩ રહે. ગોરખપુર, યુપી) અવારનવાર હોટેલ પર આવતો જતો હતો. હર્ષ અને શ્યામ બેઉ મિત્રો બની ગયેલાં. બનાવની સવારે શ્યામ હર્ષને મળવા આવેલો. વાત-વાતમાં બેઉ જણે બળાબળના પારખાં કરવા માટે એકમેકના હાથનો પંજો લડાવેલો. તે સમયે કોનો પંજો નમી ગયો તે મુદ્દે બેઉ વચ્ચે ઝઘડો થઈ ગયેલો.

બપોરે ફરી તે હર્ષને મળવા આવેલો અને સવારની બોલાચાલી મામલે નમતું જોખવાનો ડોળ કરીને હર્ષને નિર્જન ખેતર પાસે લઈ આવેલો. જ્યાં મોકો મળ્યે હર્ષની નજર ચૂકવીને તેના માથામાં પથ્થર વડે જોરદાર પ્રહાર કર્યો હતો. ગંભીર ઈજાથી હર્ષ સ્થળ પર ઢળી પડતાં શ્યામ નાસી છૂટ્યો હતો.

પોલીસથી બચવા તે ગાંધીધામ આવી ટ્રેનમાં બેસીને સુરત અને અંકલેશ્વર બાજુ નાસી ગયો હતો. વતનમાં પોલીસ પોતાની શોધખોળ કરતી હોઈ વતન જવાના બદલે આમતેમ રખડતો રહી નોકરીની શોધમાં ગાંધીધામ આવ્યો હતો. બાતમી મળતાં પોલીસે તેની ધરપકડ કરી લીધી છે. ભચાઉ પીઆઈ એ.એ. જાડેજા અને પીએસઆઈ ડી.જે. ઝાલા સહિતની ટીમે ગુનાના ડિટેક્શન માટે દોડધામ કરી હતી.