૨૨-૦૧-૨૦૧૧ના રોજ રાત્રિના અઢી વાગ્યાના અરસામાં ત્રંબૌ ગામની સીમમાં દિનેશ લાધા પટેલના ભેડીયા નજીક આવેલા ભુંગા પાસે બનાવ બન્યો હતો.

અમરસિંહે કુહાડી વડે દરવાજો ખોલતાં તેના અવાજથી અમરાભાઈની પત્ની ડાહીબેન જાગી જઈને બહાર આવેલી. આરોપીઓએ ઘેટાં લેવા આવ્યા હોવાનું જણાવીને તેની પાસે ઘેટાં માગેલાં. વાતચીતના પગલે અમરાભાઈ પણ બહાર દોડી આવેલો.

હુમલામાં અમરાને માથામાં ઈજા પહોંચી હતી અને થોડાંક કલાકો બાદ તેનું મૃત્યુ નીપજ્યું હતું.

આ ગુનામાં રાપર પોલીસે ત્રણે આરોપી સામે ઈપીકો કલમ ૩૦૨, ૩૯૪, ૩૯૭, ૩૩૭, ૩૪ હેઠળ ફરિયાદ નોંધી હતી. આજે ભચાઉના ત્રીજા અધિક સેશન્સ જજ અંદલીપ તિવારીએ પોલીસે લગાડેલી કલમો મુજબ ગુનો સાબિત થતો નથી તેમ જણાવી ઈપીકો કલમ ૩૨૫ હેઠળ મુખ્ય આરોપી અમરસિંહ સામે ગુનો સાબિત થતો હોવાનું જણાવીને તેને કેદ અને આર્થિક દંડ ફટકાર્યા છે.

કૉર્ટે જણાવ્યું કે તે ઈજા તરત જ જીવલેણ કે અતિ જોખમી પ્રકારની નહોતી. આરોપીઓનો ઈરાદો હત્યા કરવાનો હતો કે નહીં તે સાબિત કરવા માટે કોઈ પુરાવો રજૂ થયો નથી. સહઆરોપી ડાયા કોલીનું ટ્રાયલ દરમિયાન નિધન થતાં તેની સામેનો કેસ પડતો મૂકાયો હતો અને રામજી કોલીને કૉર્ટે નિર્દોષ છોડી મૂક્યો છે. આ કેસમાં સરકાર પક્ષે એજીપી ધર્મેન્દ્રસિંહ એસ. જાડેજાએ દલીલો કરી હતી.

માંડવીમાં નાસ્તાના પૈસાની માંગણી મુદ્દે થયેલી માથાકૂટમાં યુવક પર છરીથી હુમલો કરવાના કેસમાં આરોપીને માંડવીના અધિક ચીફ જ્યુ. મેજિસ્ટ્રેટ એમ.એસ. ગેલોદે એક વર્ષની સાદી કેદની સજા અને પાંચ હજારનો દંડ ફટકાર્યો છે.

વિનોદની દુકાનેથી નાસ્તો કરીને આરોપી અબ્બાસ સુલેમાન પારા (રહે. રામેશ્વર ઝૂંપડપટ્ટી, માંડવી) ઊભો થતાં વિનોદે નાસ્તાના પૈસાની માંગણી કરેલી. જેથી અબ્બાસે આપણે મિત્રો છીએ, નાસ્તાના પૈસા ના હોય તેમ કહેલું. વિનોદે ફરી પૈસાની માંગણી કરતાં અબ્બાસે ઉશ્કેરાઈને છરી વડે તેના કપાળ અને હોઠના ભાગે ઘા મારી ગંભીર ઈજા પહોંચાડેલી.

આ કેસમાં મદદનીશ સરકારી વકીલ ડી.સી. ઠાકોરે દલીલો કરી હતી.