સગીર દીકરીની માતાએ ફરિયાદમાં આરોપ કરેલો કે બનાવની રાત્રે આઠ વાગ્યે બેઉ મા દીકરી ઘરે હતા અને બે પુત્રો ખેતરે પાણી વાળવા ગયેલાં તે સમયે હરેશ સામા કોલી અને તેનો ભાઈ દલો આવેલાં. હરેશને ફરિયાદીના દીકરાની વહુ જોડે આડા સંબંધો હતા, વહુ પિયરે હતી અને ફરિયાદીનો દીકરો પત્ની જોડે ફોન પર વાતો કરતો હોઈ તેનું મનદુઃખ રાખીને બેઉ જણે ઘરમાં આવીને ‘ક્યાં છે તારા બેઉ દીકરા? આજે તો તેમને પતાવી દેવા છે’ કહી ભૂંડી ગાળો ભાંડેલી.

તે સમયે અન્ય બે ભાઈ અરવિંદ અને ભરત પણ ત્યાં ધસી આવેલાં. હરેશે ફરિયાદીની સગીર દીકરીની છાતીને સ્પર્શ કરી ધક્કો મારી નીચે પાડી દીધેલી. ચારે ભાઈઓએ બનાવ અંગે ફરિયાદ નોંધાવી તો ગામમાં રહેવા નહીં દઈએ, બધાને પતાવી દઈશું તેમ કહી ધમકી આપેલી. બનાવ બાદ સામાજિક આગેવાનોએ બેઉ પક્ષ વચ્ચે સમાધાનના પ્રયાસો કરેલાં પરંતુ સમાધાન ના થતાં બનાવના ૧૩મા દિવસે ફરિયાદ નોંધાવાયેલી.

આજે ભચાઉની વિશેષ પોક્સો કૉર્ટના ખાસ જજ અંદલીપ તિવારીએ ચારે જણને દોષી ઠેરવી એકથી ત્રણ વર્ષની કેદની સજા ફટકારી છે.

એ જ રીતે, હરેશને ઈપીકો કલમ ૨૯૪ (બી) હેઠળ એક વર્ષની સાદી કેદ, ૫૦૬ (૨) હેઠળ ૩ માસની સાદી કેદ તથા એક-એક હજારનો દંડ ફટકાર્યો છે. અન્ય ત્રણ ભાઈ દલો, અરવિંદ અને ભરતને ઈપીકો કલમ ૨૯૪ (બી) હેઠળ એક-એક વર્ષની સાદી કેદ સાથે બે-બે હજાર દંડ તથા ૫૦૬ (૨) હેઠળ એક-એક વર્ષની સાદી કેદ તથા બે-બે હજારનો દંડ ફટકાર્યો છે.