સીઆઈડી ક્રાઈમની મહિલા પોલીસ કોન્સ્ટેબલ નીતા ચૌધરી સાથે દારૂની ખેપ મારતી વખતે ભચાઉમાં ઝડપાયેલાં બૂટલેગર યુવરાજસિંહ જાડેજાની પોલીસે બાદમાં વારાફરતી અન્ય ગુનાઓમાં ‘ચોપડા’ પર ધરપકડ શરૂ કરી છે.

ભચાઉ પોલીસે ૨૧-૦૫-૨૦૨૪ના રોજ બાતમીના આધારે જૂની મોટી ચીરઈમાં યોગરાજ કનુભાઈ સોઢા નામના બૂટલેગરના ઘર પાસે આવેલી પીક અપ ગાડીમાંથી ૧.૫૮ લાખનો ભારતીય બનાવટનો વિદેશી દારૂ ઝડપ્યો હતો. શરાબનો જથ્થો યુવરાજ, યોગરાજ અને રામદેવ ઊર્ફે ડકુ જાડેજાએ મગાવ્યો હોવાની બાતમી હતી. દરોડા સમયે પોલીસને જોઈ વાહન ચાલક અને યોગરાજ નાસી છૂટ્યાં હતા જ્યારે યુવરાજ અને રામદેવ સ્થળ પર હાજર નહોતાં.

સેશન્સ જજ તીવારીએ પણ આ દલીલોને ગ્રાહ્ય રાખી જામીન અરજી ફગાવતાં જણાવ્યું કે આરોપી જામીન પર છૂટે તો ફરી આવા ગુના આચરી શકે છે.

યુવરાજની જામીન અરજી નકારાયાનાં ચોથા દિવસે આ જ કૉર્ટેમાં ભચાઉના અન્ય એક લિસ્ટેડ બૂટલેગર અશોકસિંહ ઊર્ફે મામા બાલુભા જાડેજાએ દારૂબંધીના ગુનામાં પોલીસ ધરપકડ ના કરે તે માટે આગોતરા જામીન અરજી કરી હતી. જેને કૉર્ટે મંજૂર રાખી હતી.

પોલીસે ફરિયાદમાં આરોપ લગાડ્યો હતો કે આ માલ અશોક અને રાપરના દિપુ જયેન્દ્રસિંહ જાડેજાએ સાથે મળીને મગાવેલો. માલનું કટિંગ અશોકના ભત્રીજા ભગીરથ અને ધર્મેન્દ્ર કરતાં હતા પરંતુ પોલીસને જોઈ નાસી છૂટેલાં. સ્થળ પરથી પોલીસને એકમાત્ર તેમનો માણસ હાથ લાગ્યો હતો. વાડીમાં તપાસ કરતાં અંડરગ્રાઉન્ડ ટાંકામાં છૂપાવેલો માલ પણ મળી આવ્યો હતો. આ ગુનામાં નાસતાં ફરતાં અશોક વતી તેના વકીલે દલીલ કરેલી તે ગંભીર બીમારીથી પીડાય છે અને સારવાર ચાલે છે. તેથી તેને આગોતરા આપવા જોઈએ.

ઉલ્લેખનીય છે કે, અશોક પૂર્વ કચ્છનો મોટા ગજાનો જથ્થાબંધ દારૂનો બૂટલેગર ગણાય છે. અત્યારસુધીમાં તેનો લાખો રૂપિયાનો દારૂ પકડાયો છે. તેના આ ધંધાના લીધે ભૂતકાળમાં ભચાઉ અને લોકલ ક્રાઈમ બ્રાન્ચના પીઆઈ, પીએસઆઈ સહિતના અનેક પોલીસ અધિકારી અને કર્મચારીઓ અનેકવાર સસ્પેન્ડ થઈ ચૂકેલાં છે.