પોલીસે આપેલી માહિતી મુજબ હોટેલ માલિક હારાધન ગરાઈ (ઉ.વ. ૩૩, રહે. મૂળ બાકુરા, પશ્ચિમ બંગાળ)ને અરુણની પત્ની રેખા સાથે પ્રેમ સંબંધ હતો. આ બાબતની અરુણ શાહુને જાણ થઈ ગયેલી. જેથી રેખાએ તેના પતિનો ‘કાંટો’ કાયમ માટે કાઢી નાખવા માટે પ્રેમી હારાધનને વાત કરેલી.

હારાધને તેના મિત્ર આનંદ દામજી બારોટ (રહે. મૂળ સણવા, રાપર હાલ રહે. ભીમાસર જૂના ગામ)ને અરુણની હત્યાની સોપારી આપીને કહેલું કે કામ પૂરું થતાં હું તને પાંચથી છ લાખ રૂપિયા આપીશ. જેથી આનંદે અરુણની હત્યા કરવા માટે તેના બે મિત્રો ગોપાલ રામજીભાઈ બારોટ (ઉ.વ. ૨૫, રહે. મૂળ સણવા, રાપર. હાલ રહે. ભીમાસર જૂના ગામ) અને દિલીપ નાથાભાઈ ભટ્ટી (ઉ.વ. ૨૦, મૂળ રહે. મોડા ગામ, રાપર હાલ રહે. તળાવ પાસે, ભીમાસર ગામ)ને અરુણની હત્યા કરવાનું કામ સોંપ્યું હતું.

આનંદના કહેવાથી ગોપાલ અને દિલીપ ભટ્ટીએ કાવતરું રચીને, અરુણની એકલતાનો લાભ લઈને તેનું ગળું વેતરી નાખ્યું હતું. અંજાર પોલીસે ગણતરીના કલાકોમાં આ કોન્ટ્રાક્ટ કિલીંગનો ભેદ ઉકેલી દઈને અરુણની પત્ની રેખા સહિત સોપારી આપનાર, સોપારી લેનાર, હત્યા કરનાર તમામ પાંચે આરોપીઓની ધરપકડ કરી લીધી છે.