જૂની દુધઈની બજારમાં કરિયાણાની દુકાન ધરાવતા કરસનભાઈ નાથાભાઈ ગોઠી (પટેલ)એ ગામના યુવક જાકિલશા ઊર્ફે જાબુડો નુરશા ફકીર (ઉ.વ. ૨૦) વિરુધ્ધ દુકાનમાંથી ચોરી કરી હોવાની ગત ચોથી એપ્રિલના રોજ ફરિયાદ નોંધાવી હતી. ચોરીનો બનાવ  ૨૮ માર્ચની રાત્રે બન્યો હતો. ચોરી કોણે કરી તે અંગે ફરિયાદી તેમની મેળે તપાસ કરતા હતા ત્યારે ગામના બે યુવકે તેમને જણાવ્યું હતું કે દુકાનમાં જાકિલશાએ ચોરી કરી હતી અને તેને તેમણે નજરોનજર જોયો હતો. બનાવની રાત્રે જાકિલશા ફરિયાદીની દુકાન પાસે ઊભો હતો.

આ કેસમાં પોલીસે તુરંત આરોપીની ધરપકડ કરીને એક જ અઠવાડિયામાં જરૂરી પૂરાવા, સાક્ષીઓના નિવેદનો નોંધીને કૉર્ટમાં ચાર્જશીટ દાખલ કરી દીધી હતી. અધિક ચીફ જ્યુ. મેજિસ્ટ્રેટ જે.એસ. પરમારે પણ ઝડપથી ટ્રાયલ ચલાવીને જાકિલશાને દોષી ઠેરવી ત્રણ વર્ષની કેદની સજા ફટકારી છે. આ કેસમાં મદદનીશ સરકારી વકીલ એચ.એસ. ચૌધરીએ દલીલો કરી હતી. દુધઈના પો.સ.ઈ. એમ.એમ. ઝાલાએ વરિષ્ઠ અધિકારીઓની મદદ માર્ગદર્શનથી કામગીરી કરી હતી. ઉલ્લેખનીય છે કે, જાકિલશાએ ૩૧ માર્ચની રાત્રે ગામના નરભેરામ ચામરીયા (પટેલ)એ ઘર બહાર પાર્ક કરેલી મોટર સાયકલની પણ ચોરી કરી હતી. આ ફરિયાદ પણ ચોથી એપ્રિલે દાખલ થયેલી.