દુર્ઘટનાના પગલે વધુ એકવાર જનાક્રોશ ભભૂકી ઉઠ્યો હતો. દુર્ઘટનામાં હસ્તિ બિપીનભાઈ જોશી નામની કિશોરીને ઈજાઓ થઈ હતી.

દુર્ઘટનાના પગલે સ્થાનિક રહીશોએ યોગેશ્વર ચોકડી પરથી પસાર થતાં ટ્રક ટ્રેલરો જેવા ભારેખમ વાહનોના પૈડાંની હવા કાઢીને ચક્કાજામ સર્જ્યો હતો. લોકોનું ટોળું રામધૂન બોલાવીને વચ્ચે બેસી ગયું હતું. જોતજોતામાં યોગેશ્વર ચોકડીથી નાગલપર, કળશ સર્કલ, વીડી અને નવી કૉર્ટ તરફના માર્ગો પર લાંબો ચક્કાજામ સર્જાયો હતો.

આ ચોકડી પર વારંવાર સર્જાતાં જીવલેણ અકસ્માતોના પગલે ત્રણેક વર્ષ અગાઉ પૂર્વ કલેક્ટર પ્રવિણા ડી.કે.એ ભારે વાહનો પર  પ્રવેશબંધી ફરમાવી હતી. કલેક્ટરના જાહેરનામા છતાં તેનો અમલ કરાવાતો નથી અને નિર્દોષ લોકો અકસ્માતોમાં હોમાતાં રહે છે તેવો સ્થાનિક રહીશોએ આક્રોશ વ્યક્ત કર્યો હતો.

ચક્કાજામના પગલે પરિસ્થિતિને કાબૂમાં લેવા અંજાર મામલતદાર અને અંજાર પોલીસ ઉપરાંત આદિપુર, ગાંધીધામ એ અને બી ડિવિઝન પોલીસ, એલસીબી અને એસઓજી જેવી બ્રાનચોનો પોલીસ કાફલો સ્થળ પર દોડી આવ્યો હતો. પોલીસ અને મામલતદારે લોકોની સમજાવટનો ઘણો પ્રયાસ કર્યો હતો પરંતુ રોષે ભરાયેલાં લોકોએ વાહનો જવા દેવાનો ઈન્કાર કર્યો હતો.

ઉલ્લેખનીય છે કે ગત ૧૬ માર્ચની રાત્રે આ જ સ્થળે જીવલેણ દુર્ઘટના સર્જાતાં લોકોએ ચક્કાજામ કરતાં પોલીસ દોડતી થઈ હતી. અત્યારસુધીમાં અહીં લોકોએ પાંચથી વધુ વખત ચક્કાજામ કર્યો છે પરંતુ લોકોની માંગણીને ધ્યાને રાખી આ સમસ્યાનો કાયમી ઉકેલ લાવવા કોઈ પ્રયાસો થયાં નથી.