ફરિયાદી મેઘનાએ પોલીસ ફરિયાદમાં જણાવ્યું કે સાડા પાંચ વર્ષ અગાઉ તેણે જસપાલસિંહ હકુમતસિંહ જાડેજા સાથે મૈત્રી કરાર કરેલો. જસપાલસિંહ પહેલાંથી પરિણીત છે. જસપાલ સાથેના સંબંધોથી ફરિયાદીને પુત્ર જન્મેલો જે હાલ ત્રણ વર્ષનો છે. બેઉ જણ નલિયાના હરિઓમનગરમાં ચાર વર્ષ સુધી સાથે રહેલાં.

નલિયાનું ખાલી મકાન ભાડે આપવા માટે ફરિયાદી ૧૨ માર્ચે નલિયા આવેલી. સાંજે સાડા છના અરસામાં એસટી બસમાં બેસી પરત ભુજ જતી હતી ત્યારે જસપાલસિંહે ફોન કરી તેને નલિયા રોકાઈ જવાનું કહીને પોતે માતા-પિતાને મળી તેમના સંબંધો અંગે વાત કરીને શાંતિથી રહેવા દે તેવી સમજાવટ કરશે તેમ કહેલું. જેથી ફરિયાદી બસમાંથી ઉતરી ગયેલી. થોડીકવાર બાદ જસપાલ બાઈક પર ફરિયાદીને બેસાડીને જખૌ રોડ પર આવેલી તેની આઈસ ફેક્ટરીમાં લઈ ગયો હતો.

હકુમતસિંહે તેમના પત્ની પૂજાબાને ફોન કરી ફેક્ટરીમાં બોલાવેલાં અને પૂજાબાએ પણ ફરિયાદી જોડે મારકૂટ કરેલી. ડખા સમયે હકુમતસિંહે તેમના ભાઈ ઈન્દ્રજીતસિંહ જાડેજાને ફોન કરી સ્પીકર ઓન કરીને વાતચીત કરેલી. ફરિયાદીએ આરોપ લગાડ્યો છે કે ઈન્દ્રજીતસિંહે જસપાલ અને ફરિયાદીના ફોન મેળવી લઈ, ફરિયાદીને મારી નાખી ફેક્ટરીમાં દાટી દેવાની  ધમકી આપેલી. જો કે, પોતે ગમે તેમ કરીને ફેક્ટરીમાંથી બહાર ભાગી ગઈ હતી અને જસપાલના મિત્રોને વાત કરતાં તેઓ તેને કારમાં માતાના ઘરે ભુજ મૂકી ગયાં હતાં. ઉલ્લેખનીય છે કે, ફરિયાદમાં બનાવ ૧૨ માર્ચની રાત્રે બન્યો હોવાનું લખાવાયું છે પરંતુ ફરિયાદ છેક સાડા ચાર મહિને દાખલ થઈ છે. આ વિલંબ અંગે ફરિયાદમાં કશો ખુલાસો નથી.

ફરિયાદ મામલે ઈન્દ્રજીતસિંહ જાડેજાએ કચ્છખબર સમક્ષ અજાણતા દર્શાવી કોઈ પ્રતિક્રિયા આપવાનો ઈન્કાર કરતાં કહ્યું કે અમારા વિશે આવી કોઈ ફરિયાદ દાખલ થઈ છે કે કેમ તેની અમને ખબર જ નથી.