આ મેમો આરટીઓ કચેરીમાં રજૂ કરી, નિયમભંગ બદલ ભરવાપાત્ર દંડની રકમ ભરપાઈ કરવાની હતી.

ગાડી ડીટેઈન કર્યાના ત્રીજા દિવસે વાયોર પોલીસ મથકે તે જ કિશોર આરટીઓમાં ૧૫૦૦ રૂપિયાનો દંડ ભર્યાની રસીદ રજૂ કરીને ગાડી છોડાવવા આવ્યો હતો. રસીદને જોઈને ઈન્ચાર્જ પીઆઈ કે.વી. ડાંગરને શંકા ગયેલી. કારણ કે, જે નિયમોના ભંગ બદલ કાર ડીટેઈન કરાયેલી તે નિયમોના ભંગ બદલ ભરવાપાત્ર દંડની રકમ પાંચ સાત હજારથી વધુ થતી હતી. જેથી તેમણે રસીદ જમા લઈને, સ્ટેશન ડાયરીમાં નોંધ પાડીને કારને છોડી નહોતી.

ડાંગરે આ રસીદ સાથે ભુજ આરટીઓમાં રજૂ થયેલાં પોલીસના મેમો સહિતના પ્રમાણિત દસ્તાવેજો આપવા પત્ર પાઠવ્યો હતો. આરટીઓએ જવાબમાં જે મેમોના આધારે દંડની રકમ વસૂલ કરાઈ હતી તે મેમોની નકલ મોકલતાં આખો ભાંડો ફૂટ્યો હતો.

આરટીઓમાં વાયોર પોલીસના ડીટેઈન મેમોના બદલે દયાપર પોલીસ સ્ટેશનનો નકલી મેમો રજૂ કરાયો હતો. જેમાં ગાડીનો નંબર બદલી નખાયો હતો અને ડ્રાઈવર તરીકે અમીન સિધિક જત (રહે. આશાલડી, લખપત)નું ડ્રાઈવીંગ લાયસન્સ સહિતના કાગળિયા રજૂ કરાયેલાં.

દંડની રકમ ઓછી ભરવા માટે રાવલ જતે અમીન જત સાથે ષડયંત્ર રચીને, આરટીઓમાં દયાપર પોલીસ મથકનો નકલી સહી સાથેનો બનાવટી મેમો આરટીઓમાં રજૂ કર્યો હતો.  બેઉ સામે ગુનો દાખલ કરી તેમની ધરપકડ કરવા તજવીજ હાથ ધરાઈ હોવાનું ડીવાયએસપી એમ.જે. ક્રિશ્ચિયને જણાવ્યું છે.