હાજીપીરની સત્યેશ કંપનીમાંથી મીઠું ભરીને નિકાસ અર્થે કંડલા પોર્ટ જતી ટ્રકોના ડ્રાઈવરોને ફોડીને ચોપવડા નજીક આવેલી એક કેમફૂડ કંપનીમાં માલ ખાલી કરી દેવાના કૌભાંડનો ખુદ કંપનીના સ્ટાફ, ટ્રાન્સપોર્ટરોએ પર્દાફાશ કર્યો હોવા છતાં કંડલા મરિન પોલીસે બે દિવસથી ગુનો દાખલ કર્યો નથી.

કંપનીના માલિકોને બચાવવા માટે પોલીસ એફઆઈઆર દાખલ ના કરતી હોઈ પૂર્વ કચ્છના વેપાર ઉદ્યોગ વર્તુળમાં ભારે ચકચાર મચી ગઈ છે.

એક જ ટ્રક માલિકની ત્રણ ટ્રક હાજીપીરની કંપનીમાંથી નમક લૉડ કરીને કંડલા પોર્ટ રવાના થયેલી. કંડલા પોર્ટના ભોલેનાથ વે બ્રિજ પાસે વજન કાંટો કરાવીને એક ટ્રક જેટી પર જવાના બદલે બારોબાર ચોપડવાની ખાનગી કેમફૂડ કંપનીમાં ગયેલી અને માલ ખાલી કર્યો હતો.

અધવચ્ચે માલ ચોરાઈ જવાથી માલમાં ઘટ પડતી હોઈ ટ્રાન્સપોર્ટ કંપની અને નિકાસકાર પેઢીના માણસોએ વૉચ રાખીને ખાનગી કંપનીમાં માલ ખાલી કરનારી GJ-12 BV-9828 નંબરની ટ્રકના ડ્રાઈવરને નીલકંઠ વે બ્રિજ પાસે ઝડપી પાડ્યો હતો. ડ્રાઈવરે પોતે ‘ચિઠ્ઠીનો ચાકર’ હોવાનું કહીને શેઠના કહેવાથી ખાનગી કંપનીમાં માલ ખાલી કર્યો હોવાનું કબૂલ્યું હતું. જેથી સ્થળ પર ટ્રકના માલિકને બોલાવાયો હતો.

ટ્રક માલિક થાર જીપમાં સ્થળ પર દોડી આવ્યો હતો. પ્રારંભે તેણે આ સંગઠિત ગુના અંગે કશી વિગતો જણાવી નહોતી પરંતુ ઉશ્કેરાયેલાં લોકોએ તેને સરખો ઠમઠોરતાં પોપટની જેમ તેણે ગુનો કબૂલીને ઘટસ્ફોટ કર્યો હતો કે ચોપડવાની કંપનીનો માલિક જ તેમની પાસેથી ચોરીનો માલ ખરીદે છે! આ નેટવર્કમાં વાઘેલા, મ્યાત્રા નામના અન્ય ટ્રાન્સપોર્ટર સાથે ભુજની એક અન્ય ટ્રાન્સપોર્ટ પેઢીના જવાબદારો પણ સામેલ છે.

જો કે, કૌભાંડનો પર્દાફાશ થતાં ત્રીજી ટ્રકનો માલ સીધો કંડલા પોર્ટમાં ખાલી કરાયો હતો.

કૌભાંડનો પર્દાફાશ કરનાર લોકો માલ ખાલી કરનારી ટ્રક, કાંટાની પાવતી, થાર ગાડી સાથે ટ્રક માલિકને લઈને શુક્રવારે સહુ કંડલા મરિન પોલીસ મથકે પહોંચ્યા હતા અને ગુનાહિત કાવતરું રચી, ટ્રાન્સપોર્ટરો સાથે મળીને ચોપડવાની કંપની ચોરીનો માલ  સસ્તાં ભાવે ખરીદતી હોવાની ફરિયાદ આપી હતી. પરંતુ, કંડલા મરિન પોલીસે ત્રણ દિવસથી આ ગંભીર બનાવ અંગે વિધિવત્ FIR દાખલ કરી નથી.

સૂત્રોના દાવા મુજબ ચોરીનો માલ ખરીદતી ખાનગી કંપનીના માલિકો સાથે એક ઉચ્ચ પોલીસ અધિકારીને ખાવા પીવા સહિતના સામાજિક સંબંધો છે. તેથી ઉચ્ચ પોલીસ અધિકારીના ઈશારે મામલો દબાવી દેવાયો છે. આ કંપનીનો માલિક અગાઉ પણ ચોરીનો માલ ખરીદતાં ઝડપાયેલો છે.

ચોરીના દૂષણથી ત્રસ્ત એક્સપોર્ટર પેઢીના માલિકો અને ગાંધીધામના અગ્રણી ઉદ્યોગકારોએ આ મામલે સોમવારે સીધી દિલ્હીમાં રજૂઆત કરવાનું નક્કી કર્યું હોવાનું જાણવા મળ્યું છે.