રાપરના દેશલપર ગામે રહેતા દિનેશ છગન કોલી (પારકરા)એ પોલીસને જણાવ્યું કે મંગળવારે સાંજે તેને તેના ઓળખીતા દિનેશ હરિ કોલીનો ફોન આવેલો. ‘તું મારી બેનના ફોટા ફેસબૂક પર કેમ ચડાવે છે? તેના સ્ટેટસ કેમ રાખે છે?’ તેમ કહીને દિનેશે ફરિયાદી જોડે ફોન પર ઝઘડો કરી બીજા દિવસે સવારે મળવા માટે રાપર બોલાવ્યો હતો. ફરિયાદી યુવક તેના માતા પિતાને બાઈક પર બેસાડીને ગઈકાલે બુધવારે સવારે રાપર આવેલો. આરોપી દિનેશ કોલીએ તેને ફોન કરીને રાપર સરકારી દવાખાને મળવા બોલાવેલો.

આરોપી દિનેશ કોલી બે બાઈક પર તેના ત્રણ સાગરીતો રામજી ઊર્ફે રામુ કલુભાઈ કોલી, પ્રકાશ બાબુ બોરીચા અને હરેશ કરસન કોલી સાથે સ્થળ પર આવ્યો હતો. ચારે જણે ફરિયાદીને પગમાં લોખંડના પાઈપનો પ્રહાર કરી, મુઢ માર મારીને બાઈક પર બેસાડીને રાપરના ગુરુકુળ પાસે આવેલા મંડપના ગોડાઉનમાં લઈ ગયેલાં.

ગોડાઉનમાં માર માર્યાં બાદ મુખ્ય આરોપી દિનેશ અને સાગરીતો ફરી બાઈક પર બેસાડીને દિનેશના ગામ વસાવાંઢ, ડાભુંડાના ઘરે લઈ ગયેલાં.

પુત્ર સાથે અજુગતું થયું હોવાની આશંકા સાથે પિતા છગનભાઈ કોલીએ રાપર પોલીસ સ્ટેશને પહોંચીને પોલીસને વાત જણાવેલી. છગનભાઈની વાત જાણીને ચોંકી ઉઠેલાં પીઆઈ આર.એલ. ખટાણાએ તુરંત દિનેશને શોધવા જુદી જુદી ટીમ બનાવી શોધખોળ હાથ ધરેલી. ટેકનિકલ સોર્સથી માહિતી મળેલી કે દિનેશ હાલ ડાભુંડા બાજુ છે. જેથી પોલીસ જીપમાં છગનભાઈને બેસાડીને ડાભુંડા તરફ જવા નીકળેલી.

પોલીસે સમગ્ર વિસ્તારને ઘેરી લઈને ચારે અપહરણકારોને ઝડપી પાડી અપહૃત દિનેશને ગણતરીના કલાકોમાં તેમની ચુંગાલમાંથી મુક્ત કરાવ્યો હતો. આ ઓપરેશનમાં પીએસઆઈ વી.એ. ઝા અને એચ. વી. કાતરીયા સહિતનો પોલીસ સ્ટાફ જોડાયો હતો.