રાપરમાં રહેતી પરિણીત બહેન બેઉ ટંક ટિફિન મોકલી આપે છે. ગત રાત્રે સાડા નવના અરસામાં નીતેશનો ભાણેજ મુસ્તુફા ટિફિન લઈને આવેલો અને જમ્યાં બાદ ટિફિન લઈને પરત જતો રહેલો. રાત્રે ૧૧ વાગ્યે નીતેશના બેઉ ભાણેજ મુસ્તુફા અને ઉમરશા ઘરે આવેલાં અને સાડા બાર સુધી વાતો કરીને ઘરે જતાં રહેલાં.

ભાણેજોના ગયા બાદ નીતેશ પણ સૂઈ ગયેલો. મધરાત્રે દોઢ વાગ્યે અચાનક કોઈકે તેનું પડખું ફેરવતાં તે ચમકીને જાગી ગયેલો. નજર સામે ૨૦થી ૩૦ વર્ષની વયના, મધ્યમ કદ કાઠીના ત્રણ યુવકો ઊભાં હતાં. બે જણે હેલમેટ અને મફલર બાંધીને તેમના ચહેરાં છૂપાવેલાં. ત્રીજાએ મોંઢા પર બુકાની બાંધી રાખેલી. એક જણે છરી કાઢીને સીધી નીતેશની ગરદન પર રાખીને, ભૂંડી ગાળો ભાંડીને જે હોય તે આપી દેવા જણાવેલું.

એક યુવકે મોંઢા પર મુક્કા મારેલાં. અન્યોએ નીતેશે એક હાથમાં પહેરેલી સોનાની ચાર વીંટી અને બીજા હાથમાં રહેલી એક વીંટી તથા કાંડામાં પહેરેલું ચાંદીનું લક્કી કાઢી લીધેલું. બીજાએ પેન્ટના ખિસ્સામાંથી ૨૦ હજાર રોકડાં રૂપિયા કાઢીને ૧૫ હજારનો મોબાઈલ ફોન ઝૂંટવી લીધેલો. લૂંટ બાદ ત્રણે જણ દોડીને ડેલી ખોલી નાસી ગયેલાં.

ઘટના અંગે વહેલી સવારે રાપર પોલીસ મથકે ત્રણે અજાણ્યા શખ્સો સામે હુમલા સાથે લૂંટની ગંભીર કલમો તળે ગુનો નોંધવામાં આવ્યો છે. બનાવને ગંભીરતાથી લઈ રાપર પોલીસે આખો દિવસ ગહન તપાસ કરી હતી અને ત્રણેક શખ્સોને રાઉન્ડ અપ કર્યાં છે. એસપી સાગર બાગમારે જણાવ્યું કે અમને દ્રઢ આશા છે કે ગુનાનો ઝડપથી ભેદ ઉકેલાઈ જશે.