આ પ્રમાણપત્રોના આધારે તેમની CISFની ૫૦મી બેચમાં કોન્સ્ટેબલ (જનરલ ડ્યુટી) તરીકે પસંદગી થઈ હતી અને તેમને તામિલનાડુના વેલ્લોર જિલ્લામાં આવેલા રીજનલ ટ્રેનીંગ સેન્ટરમાં બેઝીક ટ્રેનીંગ માટે મોકલી અપાયાં હતા.

CISFએ તેમણે રજૂ કરેલાં ડોમીસાઈલ સર્ટિફિકેટ ખરાઈ માટે કચ્છ કલેક્ટર કચેરીએ મોકલી આપ્યાં હતા. કલેક્ટર કચેરીએ ખરાઈ કરતાં આવા કોઈ પ્રમાણપત્રો રાપર મામલતદાર કચેરીએથી ઈસ્યૂ ના કરાયાં હોવાનું બહાર આવ્યું હતું. જેના પગલે CISFએ આઠેય જણને પાણીચું પકડાવી દઈ સ્થાનિક થાક્કોલમ પોલીસ સ્ટેશનમાં ભારતીય ન્યાય સંહિતાની કલમ ૩૧૮, ૩૩૬ (૨) અને (૩), ૩૪૦ ફોજદારી ફરિયાદ નોંધાવી હતી. જો કે, ગુનો ગુજરાતના રાપર પોલીસ સ્ટેશનની હદમાં બન્યો હોઈ થાક્કોલમ પોલીસે ઝીરો નંબરથી એફઆઈઆર રજિસ્ટર કરીને તેને રાપર પોલીસ સ્ટેશનમાં ટ્રાન્સફર કરી છે.

હાલ ૬ ઉમેદવારો સામે વિધિવત્ ફરિયાદ દાખલ થઈ છે જેમાં બાબુલાલ ભંવરલાલ શર્મા, લક્ષ હરિસિંહ યાદવ, ક્રિશ વેદપ્રકાશ યાદવ, ઉત્તમસિંગ ઉમેદસિંગ રાજપૂત, પંકજ કૈલાસચંદ સૈની અને પ્રદીપકુમાર સુલતાનરાય વર્માનો સમાવેશ થાય છે. અન્ય બે ઉમેદવારો વિરુધ્ધ ફોજદારી દાખલ કરવાની પ્રક્રિયા ચાલી રહી છે.

નકલી ડોમીસાઈલ સર્ટિફિકેટના કાંડમાં સ્થાનિક એજન્ટોની સંડોવણી હોવાનું પોલીસ માની રહી છે. આઠેય જણના બોગસ આધાર કાર્ડના આધારે આ સર્ટિફિકેટ બન્યાં છે. ઉલ્લેખનીય છે કે ભૂતકાળમાં પધ્ધર પોલીસ મથકે પણ આવા જ એક સ્કેમનો પર્દાફાશ થયો હતો જેનો રેલો ભુજમાં કલેક્ટર કચેરીમાં નોકરી કરતાં હંગામી કર્મચારી સુધી પહોંચ્યો હતો. રાપરના પીઆઈ જે.બી. બુબડીયાએ તપાસ હાથ ધરી છે.