કચ્છના પેટ્રોલ પંપ ડીલર એસોસિએશનના પ્રમુખ જગદીશભાઈ આહીરે જણાવ્યું કે છેલ્લાં થોડાંક દિવસોથી સપ્લાય ચેઈન પ્રભાવિત થઈ છે. ખાનગી ઓઈલ રીફાઈનરીઓ અગાઉ ચાર કલાકમાં ટેન્કરમાં માલ લોડ કરી આપતી હતી તે હવે ચાર દિવસે માંડ માલ લોડ કરે છે.

હકીકતે આમજનતાના વાહનો માટે પેટ્રોલ કે ડીઝલની એવી કોઈ ગંભીર તંગી નથી. દરેક પંપવાળા માલનો આગોતરો સ્ટોક કરી રાખતાં હોય છે. પરંતુ, પેનિકના લીધે જે પંપ પર રોજ ત્રણ ચાર હજાર લીટર પેટ્રોલ કે ડીઝલની ખપત થતી હતી ત્યાં અચાનક ત્રણથી ચારગણો વધુ માલ વેચાવા માંડતા તકલીફો સર્જાઈ છે.

કચ્છ ઉપરાંત અમદાવાદ સહિતના વિવિધ શહેરોમાં પણ પેટ્રોલ પંપો પર વાહનચાલકોની લાંબી કતારો લાગી છે. સરકારી તેલ કંપનીઓમાંથી નિયમિત રીતે પૂરતો પુરવઠો અપાઈ રહ્યો છે. સરકારે દાવો કર્યો છે કે રાજ્યમાં પેટ્રોલ ડીઝલનો પૂરતો જથ્થો ઉપલબ્ધ છે અને આવી અફવાઓથી લોકો દૂર રહે. રાજ્યના અન્ન નાગરિક પુરવઠા વિભાગના અધિક મુખ્ય સચિવ મોના ખંધારે જણાવ્યું છે કે રાજ્ય પાસે પેટ્રોલ ડિઝલનો બફર સ્ટોક પણ ઉપલબ્ધ છે.