મરણ જનાર સોયેબ ઓસમાણ સમા ઘરે હતો ત્યારે તેમના જ ફળિયામાં થોડેક દૂર રહેતા અસ્લમ અભેરાજ સમા (ઉ.વ. ૨૧) અને તેનો નાનો ભાઈ અલ્તાફ અભેરાજ સમા (ઉ.વ. ૧૯) બેઉ જણે ઘરમાં ઘૂસીને સોયેબ પર હુમલો કર્યો હતો. ‘તું અમારી બહેનને શા માટે મોબાઈલ ફોન કરે છે?’ તેમ કહીને બેઉ ભાઈઓએ માથાકૂટ કરેલી.

ગંભીર ઈજાથી સોયેબ જમીન પર ફસડાઈ પડેલો. અન્ય સગાં સંબંધીઓ દોડી આવતાં બેઉ જણાં છરી લઈ બાઈક પર ત્યાંથી નાસી ગયાં હતા.

પોલીસની તપાસમાં બહાર આવ્યું હતું કે સોયેબના દાદા હુસેન સિધિક સમાનો મોબાઈલ ફોન બે ત્રણ દિવસથી ગુમ થઈ ગયેલો. દાદાનો ફોન શોધવા માટે સોયેબે મોબાઈલમાં રીંગ મારેલી. ફોન આરોપીઓની બહેન પાસે હતો. જેથી બેઉ જણને સોયેબના પોતાની બહેન જોડે આડા સંબંધ હોવાની શંકા ગયેલી અને આવેશમાં આવીને તેમણે હત્યા કરી દીધી હતી.

બચાવ પક્ષે ગુનાનો મોટિવ સાબિત થતો નથી તથા ફરિયાદ પક્ષે રજૂ કરેલાં સાક્ષીઓની જુબાનીમાં રહેલી નાની નાની વિસંગતતાઓના આધારે કેસ પુરવાર થતો ના હોવાની દલીલ કરેલી. જો કે, બનાવને નજરે જોનાર અનેક સાક્ષીઓની જુબાની, આરોપીઓના લુગડાં પરથી મળેલાં લોહી સાથે મૃતકના લોહીના મેચ થયેલાં નમુના સહિતના વિવિધ મજબૂત પુરાવાના આધારે કૉર્ટે બેઉ ભાઈને દોષી ઠેરવી સજા ફટકારી છે.

ગુનામાં પોલીસે લગાડેલી અન્ય કલમ જેવી કે ઈપીકો કલમ ૩૨૪, ૨૯૪ (ખ), ૧૧૪ અને જીપી એક્ટ સેક્શન ૧૩૫ હેઠળ બેઉને દોષમુક્ત ઠેરવ્યાં હતા. આ કેસમાં ફરિયાદ પક્ષે અધિક જિલ્લા સરકારી વકીલ સુરેશ એ. મહેશ્વરી અને મૂળ ફરિયાદ પક્ષના એડવોકેટ આર.એસ. ગઢવીએ દલીલો કરી હતી.