ખાનગી હોસ્પિટલમાં નોકરી કરતી પ્રેમિકાને ગઈકાલે સવારે બાઈક પર બેસાડીને વિરાજ ભુજમાં ફરવા લઈ ગયો હતો. બપોરે અઢી વાગ્યે પ્રેમિકાને હોસ્પિટલમાં પરત મુકવા જતો હતો ત્યારે રસ્તામાં ઉમાનગર પાસે યુવતીના પિતા અને ભાઈએ તેને આંતરીને ઝઘડો કરી મારકૂટ શરૂ કરેલી.

મારથી બચવા વિરાજ બાઈકને પડતું મુૂકીને ભાગ્યો તો બે અજાણ્યા શખ્સે તેને પકડી લીધો હતો. યુવતીના પિતા અને ભાઈએ તેના હાથ પગ બાંધી દઈને ઓળખીતા રીક્ષાચાલકને ફોન કરી સ્થળ પર બોલાવ્યો હતો. રીક્ષામાં તેની મારકૂટ કરતાં કરતાં ભગવતી હોટેલ પાછળ મોમાય વોટર પ્લાન્ટ પાસે લઈ જવાયો હતો. ત્યાં વિરાજની પ્રેમિકાની માતા અને બહેન પણ આવી ગયા હતા.

યુવતીના પિતાએ તેને ધમકી આપી હતી કે ‘જો બીજીવાર મારી છોકરી જોડે કોઈપણ જાતનો સંબંધ રાખે તો જાનથી મારી નાખશું’ યુવકની રાડારાડના પગલે કોઈકે પોલીસને જાણ કરી દેતાં પોલીસ સ્થળ પર દોડી ગઈ હતી અને એમ્બ્યુલન્સ બોલાવી યુવકને જી.કે. જનરલમાં સારવાર માટે ખસેડ્યો હતો.

ભોગ બનનારને ડાબા હાથમાં અને જમણા હાથની આંગળીમાં ફ્રેક્ચર સહિત પીઠ, ખભા, પગમાં ઈજાઓ પહોંચી છે. વિરાજ જોશીએ આપેલી ફરિયાદના આધારે ભુજ એ ડિવિઝન પોલીસે મિરજાપરના લાખાભાઈ રબારી, ધર્મેશ લાખાભાઈ રબારી, લાખાભાઈ રબારીની પત્ની અને દીકરી કિરણબેન, બે અજાણ્યા શખ્સો તથા અજાણ્યા રીક્ષાચાલક સહિત સાત લોકો સામે અપહરણ, ગેરકાયદે મંડળી બનાવી હુમલો કરવા સહિતની કલમો તળે ગુનો નોંધી તપાસ શરૂ કરી છે.