૧૨ જાન્યુઆરીના રોજ મુંદરા તાલુકાના એક ગામ નજીક શ્રમિક વસાહતમાં બાળકી પર દુષ્કર્મનો બનાવ બન્યો હતો. ઝારખંડનું યુગલ મજૂરીકામે ઘરબહાર ગયેલું ત્યારે પડોશમાં રહેતા મનીષકુમાર નામના ૨૬ વર્ષિય નરાધમે માસૂમ બાળકીને નિશાન બનાવી હવસ સંતોષી હતી. બનાવમાં બાળકીને પ્રાઈવેટ પાર્ટમાં ગંભીર ઈજાઓ થઈ હતી. ઘટના બાદ બાળકીને ભદ્રેશ્વર આરોગ્ય કેન્દ્ર, મુંદરા સિવિલ હોસ્પિટલ અને ત્યારબાદ ભુજ જી.કે. જનરલ હોસ્પિટલમાં સારવાર અર્થે ખસેડાઈ હતી.

આ રિપોર્ટને ગંભીરતાથી લઈ જજ જે.એ. ઠક્કરે ભદ્રેશ્વર આરોગ્ય કેન્દ્ર, મુંદરા સિવિલ હોસ્પિટલ અને જી.કે. જનરલ હોસ્પિટલના જવાબદાર અધિકારીઓ તથા સિવિલ સર્જનને કારણદર્શક નોટિસ ફટકારી છે. સરકારી સંસ્થાઓએ કૉર્ટ સમક્ષ કરેલી રજૂઆત સમયે જિલ્લાના મુખ્ય સરકારી વકીલ એચ.બી. જાડેજા પણ ઉપસ્થિત રહ્યા હતા.

સૂત્રોમાંથી પ્રાપ્ત માહિતી મુજબ ગુનાનો ભોગ બનનાર બાળકીને મુંદરાની હોસ્પિટલે વધુ સારવાર માટે ભુજ જી.કે. જનરલ હોસ્પિટલમાં રીફર કરી હતી. બાળકીને લઈ તેની માતા પરોઢે સાડા ચાર વાગ્યે જી.કે. જનરલ હોસ્પિટલમાં પહોંચી હતી. પરંતુ, ૧૨ કલાક સુધી હોસ્પિટલમાં બાળકીની સારવાર કરાઈ નહોતી. તેને ઈન્ડોર પેશન્ટ તરીકે એડમિટ કરાઈ ના હોઈ માતા બાળકીને લઈ હોસ્પિટલમાં ઠેબે ચઢતી રહેલી. આખરે સાંજે સાડા ચાર પાંચ વાગ્યે બાળકીનું ઓપરેશન કરવામાં આવ્યું હતું.