અબડાસાના મોટા કરોડિયા ગામના ૧૫ વર્ષના કિશોરને ૧૭ મેની બપોરે કોઠારાના પ્રતાપસિંહ નામના કોન્સ્ટેબલે ફોન કરી મળવા બોલાવ્યો હતો. પોતે બહારગામ હોવાનું કહીને કિશોર મળવા ગયો નહોતો. થોડીકવાર બાદ તે મોટર સાયકલ લઈને ગામમાંથી જતો હતો ત્યારે ગામના મહિલા સરપંચના શિક્ષક પતિ વાલજી લક્ષ્મણ ગઢવી ઊર્ફે માસ્તરે તેને પકડાવી દીધો હતો.

અહીં ત્રણ પોલીસ કર્મચારીએ પવનચક્કીને લગતી ચોરીનો કોઈ ગુનો કબૂલાવવા માટે કિશોરને નગ્ન કરીને અસહ્ય માર મારી તેની નગ્નાવસ્થાનો વીડિયો રેકોર્ડ કર્યો હતો. આ વીડિયો ગામમાં વાયરલ કરવાની ધમકી આપેલી.

ત્યારબાદ કિશોરને કોઠારા પોલીસ મથકે લઈ જવાયો હતો. અહીં માસ્તર પણ હાજર હતો. પોલીસ મથકમાં ફરી તેની મારકૂટ કરાયેલી. એક પોલીસવાળો તેના પગ પર ઊભો રહી ગયેલો અને બીજાઓએ તેને પટ્ટાથી માર માર્યો હતો. ત્યારબાદ કિશોરને ભુજ લઈ આવ્યાં હતાં. રસ્તામાં કિશોરે પીવાનું પાણી માંગતા એક પોલીસવાળાએ તેના મોઢાં પર પાણીની બાટલી ફટકારી હતી. રાત્રે કિશોરને ભુજના કોટાયા ગામ નજીક ઉતારી પોલીસવાળા જતાં રહ્યાં હતાં.

કિશોરના પિતાએ એક વીડિયોમાં આરોપ કર્યો છે કે વાલજી માસ્તરે તેમના પુત્રને ખોટી રીતે પકડાવી, તે ચોર હોવાનું કહીને ગામમાં વીડિયો વાયરલ કરીને તેને બદનામ કરી રહ્યો છે.

દસ દિવસ જૂનો આ ગંભીર બનાવ કચ્છ ચારણ સભાના પૂર્વ પ્રમુખ અને પૂર્વ પોલીસ ઈન્સ્પેક્ટર વિજય ગઢવીના ધ્યાને આવતાં તેમણે ૨૨ મે ગુરુવારના રોજ કોઠારા પીઆઈને રૂબરૂ રજૂઆત કરી ફરિયાદ દાખલ કરવા લેખિત રજૂઆત કરેલી. એટલું જ નહીં, એસપીને પણ રજૂઆત કરેલી, છતાં પોલીસ તંત્રના પેટનું પાણી હલ્યું નથી અને જવાબદાર પોલીસ કર્મચારીઓ અને વાલજી માસ્તર સામે કોઈ જ પગલાં લેવાયાં નથી. ગઢવીએ જણાવ્યું કે ઘટનાની આ કિશોરના માનસ પર એવી ગંભીર અસર પડી છે કે ગાડી જૂએ તો પણ ગભરાઈ જાય છે.

પોલીસની નિષ્ક્રિયતાથી રોષે ભરાઈને વિજય ગઢવીએ સોશિયલ મીડિયા પર તેમનું બયાન પોસ્ટ કરતાં જણાવ્યું છે કે આ કોઈના બાપનું રાજ નથી કે આ રીતે પોલીસ કોઈના છોકરાને ઉપાડી જઈ, નાગો કરી માર મારે. પોલીસને ખનિજ ચોરી, દારૂ જુગારના ધંધા દેખાતાં નથી. આવી જોહૂકમી પોલીસ કરતી રહેશે તો સામાન્ય માણસનું જીવવું દુષ્કર થઈ જશે અને આ બનાવને સૌ સમાજે ગંભીરતાથી લેવો પડે. જો પોલીસ તંત્ર કોઈ પગલાં નહીં લે તો પોતે કાયદેસર કાર્યવાહી કરશે.

ભારતીય કાયદા મુજબ ૧૮ વર્ષથી ઓછી વયના કિશોરો માઈનોર ગણાય છે. તેમની સામે કોઈ ગંભીર ગુનાનો આરોપ હોય તો પણ તેમની ધરપકડ કરવાની જોગવાઈ નથી. ત્યારે, કોઠારા પોલીસનું આ કરતૂત ભારતીય ન્યાય સંહિતા ઉપરાંત પોક્સો, જૂવેનાઈલ જસ્ટીસ એક્ટ, આઈટી એક્ટ જેવા વિશેષ ગુનાઓની જોગવાઈઓ મુજબ ગંભીર ગુનો બને છે અને જવાબદારો સામે જો એફઆઈઆર દાખલ કરવામાં વિલંબ થાય તો તે બદલ પણ ઉચ્ચ અધિકારીઓ સામે કડક પગલાં લેવાની જોગવાઈઓ છે.