ભચાઉ તાલુકાના એક ગામમાં રહેતા પરિવારે એક માસથી ઘરના એક રૂમમાં યુવતીને પૂરી રાખી હતી. આ પરિવાર યુવતી જોડે  મારકૂટ કરતો રહેતો હતો. પડોશમાં રહેતા જાગૃત નાગરિકે ૧૮૧ અભયમ મહિલા હેલ્પ લાઈનને જાણ કરતાં કાઉન્સેલર નિરૂપા બારડ અને મહિલા પોલીસ કોન્સ્ટેબલ ચંદ્રિકાબેન ઠાકોર તાત્કાલિક ઘટનાસ્થળે પહોંચી ગયાં.

જે ઘરમાં યુવતીને બંધ કરી રાખવામાં આવી હતી ત્યાં જઈને તપાસ કરતાં સૌપ્રથમ ઘરવાળાએ રૂમમાં કોઈ યુવતીને બંધક બનાવી હોવાનો ઈન્કાર કર્યો હતો.

અભયમની ટીમે તેને સહાનુભૂતિ સાથે સંપૂર્ણ મદદની ખાતરી આપીને કાઉન્સેલિંગ કરતા યુવતીએ જે જણાવ્યું તે જાણીને સૌ ચોંકી ઉઠ્યાં.

સંગીતા (નામ બદલેલું છે)એ જણાવ્યું કે તે બે દિવસથી ભૂખી છે. તે મહારાષ્ટ્રની રહેવાસી છે. થોડાંક સમય અગાઉ તેણે મહારાષ્ટ્રમાં જ એક યુવક સાથે માવતરની મરજી વિરુધ્ધ જઈ પ્રેમ લગ્ન કરેલાં. લગ્ન કર્યાના થોડાંક સમય બાદ તે પિયરે આવેલી.

યુવતીએ લગ્નના નામે પૈસા આપી તેને ખરીદનાર કહેવાતા પતિ અને સાસરિયાને બધી સાચી વાત કરી.

સંગીતાએ જે પ્રથમ યુવક જોડે પ્રેમ લગ્ન કરેલાં તે યુવક સાથે કાયદેસર રીતે છૂટાંછેડા થયાં નહોતાં. પૈસા ચૂકવી ખરીદી કરનાર બીજા પતિ અને તેના પરિવારને મનમાં ડર પેઠો કે સંગીતા લાગ જોઈને પહેલાં પતિ જોડે રહેવા નાસી જશે. તેથી તેમણે સંગીતાને ઘરના એક રૂમમાં બંધ કરી દીધી.

પતિ અને સાસરિયા તેને ખાવાનું પણ માંડ આપતા. આખો દિવસ તેઓ મારકૂટ અને શારીરિક અત્યાચાર ગુજારતાં રહેતાં.

અભયમની ટીમે સંગીતાના માવતર જોડે તેમની દીકરી પર ગુજારાઈ રહેલાં અત્યાચાર અંગે વાત કરી. પરંતુ, કળિયુગી માવતરે કશી જ લાગણી દર્શાવ્યાં વગર ટીમને જણાવી દીધું કે ‘સંગીતા અમારી દીકરી નથી, તેને મારી નાખો’

અભયમની કાર્યવાહીના પગલે બીજા પતિ અને સાસરિયાએ પણ સંગીતાને રાખવા ઈન્કાર કરતાં જણાવ્યું કે ‘અમને તેના પહેલાં લગ્નની જાણ નહોતી, હવે અમે તેને રાખશું નહી’ સંગીતાને મુક્ત કરાવનાર અભયમની ટીમ મૂંઝવણમાં મૂકાઈ ગઈ. બાદમાં સંગીતા પાસેથી તેના પહેલાં પતિનો નંબર લઈ તેનો સંપર્ક કર્યો.

તેણે અભયમની ટીમને જણાવ્યું કે ‘મારી સંગીતાને મારી પાસે મોકલી આપો, હું તેને જીવનભર પત્ની તરીકે રાખવા તૈયાર છું’

અભયમની ટીમ સંગીતાને પોતાની સાથે લઈ આવી. સૌપ્રથમ તો બે દિવસથી ભૂખી રહેલી સંગીતાને ભરપેટ ભોજન કરાવ્યું. તાત્કાલિક તેને મહારાષ્ટ્ર પરત મોકલવા માટે ટ્રેનની ટિકિટ બૂક કરાવી. ટ્રેનમાં સહીસલામત રીતે બેસાડીને જરૂરી નાસ્તો લઈ આપ્યો. નિરુપાબેને અંગત ગજવામાંથી તેને વાપરવા માટે થોડાં રૂપિયા પણ આપ્યાં. સંગીતા સહીસલામત પ્રથમ પતિ પાસે પહોંચી ગઈ. પતિ પાસે પહોંચ્યા બાદ બેઉ જણે વીડિયો કૉલ કરીને અભયમનો હૃદયપૂર્વક આભાર માન્યો.

સંગીતા પર ગુજારાયેલાં અત્યાચારની ઘટનાનો સુખદ અંત આવી ગયો છે પરંતુ અફસોસ કે તેને એક માસ સુધી બંધક બનાવી અત્યાચાર ગુજારનાર ભચાઉના એ નિર્દયી પતિ, સાસરિયા તથા સંગીતાના માવતર કાયદાની જાળમાંથી છટકી ગયાં છે.

આ કિસ્સામાં અભયમની ટીમે કાયદેસર કાર્યવાહી કરવા પ્રયાસ કરેલો પરંતુ સંગીતાએ કોઈ જ પ્રકારની ફોજદારી ફરિયાદ નોંધાવવાનો સતત ઈન્કાર કર્યે રાખ્યો હતો.