બાતમીના આધારે પોલીસે કોડાય ચેકપોસ્ટ અને સર્કલ પર વૉચ ગોઠવી દીધી હતી.

સાડા ત્રણ વાગ્યે મુંદરા બાજુથી આવતી GJ-12 AU-9725 નંબરની ટ્રકને પોલીસે ઈશારા વડે રોકવા સૂચના આપતા ટ્રકચાલકે ગાડી રોકવાના બદલે કોડાય ગામ તરફ પૂરઝડપે હંકારવાનું શરૂ કરેલું. પોલીસે પણ ટ્રકને રોકવા પીછો શરૂ કરેલો. એકાદ કિલોમીટર બાદ પોલીસે ગામના સ્વામિનારાયણ મંદિર પાસે ટ્રકને આંતરીને થોભાડાવી તેમાં બેઠેલાં બે શખ્સોને દબોચી લીધા હતા.

ટ્રકને પોલીસ મથકે લાવીને તાડપત્રી હટાવીને તપાસ કરાતાં તેમાંથી ૫.૭૦ લાખના વિવિધ બે બ્રાન્ડના બિયરના ૫૭૧૨ નંગ ટીન તથા ૩૫ લાખથી વધુ મૂલ્યની વિવિધ પાંચ બ્રાન્ડની વ્હિસ્કીની ૭૬૬૮ નંગ બાટલીઓ મળી આવી હતી. આ બાટલીઓ પંજાબના મોહાલીની ડિસ્ટલરીની છે પરંતુ તેના પરથી બેચ નંબર ભૂંસી નખાયેલા છે.

પોલીસે ઝડપેલા ટ્રક ડ્રાઈવર નવુભા ખેતુભા જાડેજા (રહે. નાની ખોંભડી, નખત્રાણા)ની પૂછપરછ કરતાં તેણે જણાવ્યું કે મોબાઈલ એપ મારફતે જીતીયાએ તેને ફોન પર મુંદરાના પ્રાગપર કપાયા વચ્ચેની કેનાલ પાસેથી દારૂ ભરેલી ટ્રકનો કબજો લઈ લેવા અને કોડાય ક્રોસ કરીને ધુણઈ પહોંચી જાણ કરવા સૂચના આપેલી. નવુભા સાથે ટ્રકમાં બેસેલા આઈદાનસિંગ ગોવર્ધનસિંહ રાઠોડ (રહે. જેસલમેર, રાજસ્થાન)એ પોલીસને જણાવ્યું કે તે નખત્રાણા હતો ત્યારે યુવરાજે તેને ફોન કરીને પ્રાગપર પહોંચીને નવુભાનો કોન્ટેક્ટ કરી તેની જોડે ટ્રકમાં જવા સૂચના આપી હતી.

ઉલ્લેખનીય છે કે હજુ પાંચ દિવસ અગાઉ પાંચમી સપ્ટેમ્બરે બનાસકાંઠા એલસીબીએ પાલનપુર પાસેથી યુવરાજે મગાવેલો ૧.૧૭ કરોડનો શરાબ લઈ જતી ટ્રક ઝડપી હતી. આ અગાઉ ૨૩ મેના રોજ સ્ટેટ મોનિટરીંગ સેલની ટીમે ત્રગડીમાં દરોડો પાડીને યુવરાજે મગાવેલો ૮૩.૭૮ લાખનો શરાબનો જથ્થો જપ્ત કર્યો હતો. ત્યારબાદ, ૯મી જૂલાઈના રોજ એલસીબીએ માંડવીના તલવાણા પાસે ગેસ ટેન્કરમાં છૂપાવીને યુવરાજ જીતીયાએ મગાવેલો ૧.૫૫ કરોડનો શરાબ બિયરનો જથ્થો જપ્ત કરેલો. ત્યારબાદ ૬ઠ્ઠી ઑગસ્ટે એલસીબીએ ત્રગડીની સીમમાં રેઈડ પાડીને યુવરાજ જીતીયાએ મગાવેલો ૪૧.૪૫ લાખનો શરાબનો જથ્થો જપ્ત કરેલો. આમ છેલ્લાં ત્રણ માસમાં પોલીસે ચોપડા પર સત્તાવાર રીતે પાંચમી વખત યુવરાજે મગાવેલો લાખો કરોડોનો માલ ઝડપ્યો છે.

પોલીસ માટે કહેવાય છે કે તે ધારે તો પાતાળમાંથી પણ આરોપીને પકડી લાવી શકે છે. આશ્ચર્યની બાબત એ છે કે યુવરાજ અને જીતીયો પોલીસને લાંબા સમયથી હાથ લાગતાં નથી. સૂત્રો કહે છે કે બેઉ જણ ગુજરાત બહાર નાસી ગયાં છે. ત્યારે, આ લિસ્ટેડ બૂટલેગરોએ પોલીસને આંટી મારી જાય એવું તો કેવું જબરદસ્ત નેટવર્ક ગોઠવ્યું છે કે અવારનવાર કરોડોનો માલ પકડાતો હોવા છતાં તેઓ બિન્ધાસ્ત રીતે એકાંતરા દિવસે ટ્રકોની ટ્રકો ભરીને કચ્છમાં શરાબનો જથ્થો ઠાલવી રહ્યાં છે!