બનાવ અંગે મૃતક વિજય મનુભાઈ વૈષ્ણવના પિતા મનુભાઈ દલપતરામ વૈષ્ણવ (ઉ.વ. ૭૧, રહે. મહાવીરનગર, કોડાય, માંડવી)એ પડોશમાં રહેતા પરિમલ વિરુધ્ધ ફરિયાદ નોંધાવી હતી. ફરિયાદમાં જણાવ્યા મુજબ સંતાનમાં સૌથી મોટો પુત્ર વિજય હતો અને ત્યારબાદ બે દીકરીઓ છે.

બપોરે હત્યાની જાણ થયેલી. મૃતક વિજયે પિતાને જણાવેલું કે તેની અને પરિમલ વચ્ચે નાણાંની લેતી-દેતી મામલે અવારનવાર બોલાચાલી થાય છે. પરિમલે તે મામલે વિજયની હત્યા કરી નાખી છે.

વિજયની પત્ની અને પરિમલની પત્ની બેઉ શિક્ષિકા છે. પરિમલ પણ અગાઉ શિક્ષક તરીકે નોકરી કરતો હતો અને ૨૦૨૦માં રાજીનામું આપીને તે વિજયની માલિકીની પેઢી વિરમ એન્ટરપ્રાઈઝમાં ભાગીદાર તરીકે જોડાયેલો. તેમની પેઢી પાણી પુરવઠા અને નર્મદા નિગમના સિવિલ વર્ક્સના કોન્ટ્રાક્ટ લે છે. 

વિજય બધા પૈસા પોતાની પાસે રાખી લેતો હોવાનો અને પૂરતું વળતર આપતો ના હોવાનો પરિમલને શક હતો. આ મામલે બેઉ વચ્ચે અવારનવાર વિવાદ સર્જાતો હતો.

પરિમલે વિજય પાસે તેને મળેલ પેમેન્ટમાંથી ૧૫ લાખ રૂપિયા માગ્યા હતા. વિજયે તેને ગઢશીશાની સાઈટ ખાતે જઈ ૧૫ લાખ રૂપિયા આપી દેવાનું જણાવેલું. બુધવારે બેઉ જણ બોલેરોમાં ગઢશીશા આવવા નીકળેલાં. રસ્તામાં રાજપર નજીક વિજયે ગાડી થોભાવેલી અને કોઈકને ફોન કરી પેમેન્ટ આપવાની વાત કરેલી. બેઉ જણ થોડીકવાર માટે ગાડીની બહાર આવીને ઊભાં રહ્યાં હતા.

જેથી ઉશ્કેરાઈને પોતે ગાડીમાં રાખતો હતો તે છરી કાઢીને તેના ગળામાં ઝીંકી દીધી હતી. હત્યા બાદ લાશને ત્યાં જ રાખીને કોડાય પોલીસ મથકે હાજર થઈ ગયો હતો. ગઢશીશાના ઈન્ચાર્જ પીઆઈ આર.બી. ટાપરીયા સઘન પૂછપરછ તપાસ કરી રહ્યા છે.