ભુજના કેમ્પ એરિયાના ભાવેશ્વનગરમાં આદિનાથ એલિટામાં રહેતી ૩૪ વર્ષિય ગૃહિણી રીમાબેન વિકાસભાઈ મહેતાએ બનાવ અંગે ભુજ બી ડિવિઝન પોલીસ મથકે ફરિયાદ નોંધાવી છે. રીમાબેનના પતિ વિકાસ મહેતા ફર્નિચરનો શૉરૂમ ધરાવે છે. ૩૦ ડિસેમ્બરે રીમાબેનને અજાણ્યા નંબર પરથી ફોન આવેલો. ફોન કરનારે પોતે ફેડએક્સ કૂરિયરમાંથી બોલતો હોવાનું જણાવી તેમના આધાર કાર્ડના નંબર પર મુંબઈથી તાઈવાનમાં એક કૂરિયર મોકલાયું હોવાનું કહેલું.

ફરિયાદીએ ઓનલાઈન કમ્પ્લેઈન્ટનો વિકલ્પ પસંદ કરતાં કૉલરે ફોન ક્રાઈમ બ્રાન્ચમાં ટ્રાન્સફર કરી દીધો હતો.

ક્રાઈમ બ્રાન્ચના અધિકારી બનેલાં શખ્સે મોબાઈલમાં સ્કાઈપી એપ ડાઉનલૉડ કરાવી વીડિયો કૉલ કરાવીને તેમની કહેવાતી ફરિયાદ નોંધવાનું નાટક કરેલું. બાદમાં તમારા આધાર નંબરનો બીજે ક્યાંય દુરુપયોગ તો નથી થયો ને તે વેરીફાઈ કરી લઈએ કહી, વેરીફિકેશન કરીને તમારા આધાર નંબર પર દેશના વિવિધ રાજ્યોની વિવિધ બેન્કોમાં એકાઉન્ટ ખૂલ્યાં હોવાનું, ખાતામાં ૨૧ કરોડ રૂપિયા જમા હોઈ મની લોન્ડરિંગનો કેસ થયો હોવાનું જણાવીને ગૃહિણીને ડરાવી દીધી હતી.

જેથી ગૃહિણીએ તેના તમામ શેર વેચી મારીને યુપીઆઈથી ૯૫ હજાર રૂપિયા ગઠિયાઓએ આપેલા બેન્ક ખાતામાં ટ્રાન્સફર કર્યાં હતાં. બાદમાં બીજી જાન્યુઆરીના રોજ બેન્કમાં રહેલી ફિક્સ ડિપોઝીટ તોડાવી ૩.૫૦ લાખ રૂપિયા RTGSથી ટ્રાન્સફર કરાવી મેળવી લીધાં હતાં.

પોતાની પાસે રહેલા તમામ ૪.૪૫ લાખ રૂપિયા જમા કરાવી લીધાં બાદ ગૃહિણીએ જમા કરાવેલાં રૂપિયા ક્યારે પાછાં મળશે? તેમ પૂછતાં ફાયનાન્સ ઑફિસર બનેલાં અન્ય એક ગઠિયાએ વધુ ૨.૮૫ લાખ રૂપિયા જમા કરાવવા કહેલું. જો કે, ગૃહિણીએ હવે કશું વધ્યું ના હોવાનું જણાવી રૂપિયા જમા કરાવવાનો ઈન્કાર કરી દેતાં ગઠિયાઓએ રકમ ટ્રાન્સફર થયે તરત એનઓસી સાથે બધા રૂપિયા પાછાં મળી જશે તેમ જણાવેલું. ગૃહિણીએ આ રકમ પતિ પાસે માંગીને બધી વાત કરતાં પતિએ તે સાયબર ફ્રોડનો ભોગ બની હોવાનું જણાવી ફરિયાદ નોંધાવડાવી છે. પોલીસે જુદાં જુદાં ત્રણ મોબાઈલ નંબર અને બે બેન્ક એકાઉન્ટધારક વિરુધ્ધ ગુનો નોંધી તપાસ હાથ ધરી છે.