જાથાના ચેરમેન એડવોકેટ જયંત પંડ્યાએ જણાવ્યું કે ગાંધીધામના સેકટર-૧માં આવેલા ભાનુદર્શન એપાર્ટમેન્ટમાં છેલ્લા ૩૦ વર્ષથી જ્યોત્સનાબેન મોહનભાઈ રાજપુત નામની મહિલા ભુઈ બનીને ઘરમાં માતાજીનો મઢ બનાવી લોકોના દુ:ખ-દર્દ જોવાનું, માલિશનું કામ કરતી હતી.

ભુઈથી પીડિત ગાંધીધામના એક પરિવારે રાજકોટમાં જાથાના કાર્યાલયે રૂબરૂ આવી તેની ધતિંગલીલાની આપવીતી વર્ણવી હતી.ભુઈ વિધિના નામે લોકોને દસ હજારથી પચાસ હજારના ખાડામાં ઉતારતી. માતાજીના દસ હાથ પોતાના ઉપર છે તેવું કહીને લોકોને માનતા ટેક લેવડાવતી, ઘરમાં બનેલા મઢના દર્શને બોલાવતી, કંકુસ્નાન કરવું, અમુક વાર ભરવા, પગનો દુઃખાવો દૂર કરવાના બહાને પાખંડલીલા આચરતી.

ભુઈનો વેવાઈ ભુવા ભવન કરશન જાદવ માતાજીની રમણ વખતે ધૂણતો. આ ભુવો મજબુર મહિલાનું યેનકેન રીતે શોષણ કરતો હોવાની પીડિત પરિવારે પૂરાવારૂપે વિડીયો કિલપ પણ આપી હતી. ભુઈ એપાર્ટમેન્ટમાં રહેતા રહીશોને ખૂબ ત્રાસ આપતી. જેના પગલે જાથાએ હકીકતની ખરાઈ કરવા બે મહિલા કાર્યકરને શ્રધ્ધાળુ બનાવીને ભુઈના ઘેર મોકલી હતી. ખરાઈ થયાં બાદ જાથાએ ગાંધીધામ બી ડિવિઝન પોલીસની મદદથી ભુઈના ઘરે જઈને તેના પાખંડનો પર્દાફાશ કર્યો હતો.

ભુઈને પોલીસ સ્ટેશન લાવવામાં આવી હતી. બાદમાં પોતે કાયમી ધોરણે હવે દોરા ધાગા, જોવાનું કામ બંધ કરશે તેવું કબૂલાતનામું આપીને ભુઈએ માફી માગી હતી. જાથાની ટીમ ભચાઉમાં ભુવા ભવન જાદવના ઘરે પહોંચતાં તે ફરાર થઈ ગયો હતો. વર્તમાન પરિસ્થિતિના કારણે ભુવાનો પર્દાફાશ આગામી દિવસોમાં કરવાનું નક્કી કર્યું છે. જાથાનો આ ૧૨૬૯મો પર્દાફાશ હતો. જેમાં જાથાના વિવિધ કાર્યકરો અને પોલીસ સ્ટાફે સહયોગ આપ્યો હતો.