૧૯ જૂનની સાંજે હાજીપીરની સત્યેશ કંપનીમાંથી બે ટ્રકમાં ૮૯ ટન મીઠું લોડ કરીને રેન્કર્સ ઈન્ટરનેશનલ પ્રા.લિ. કંપનીએ તેને કંડલા પોર્ટમાં રવાના કરી હતી. કંડલા પોર્ટ પર શીપમાં મીઠું લોડીંગ કરાવતી બાલાજી ઈન્ફ્રા પોર્ટ નામની પેઢીના યાર્ડમાં આ મીઠું ખાલી કરાતું હોય છે.

પરંતુ, રેન્કર્સ કંપનીના શામજી ભરતભાઈ રાઠોડે જવાબદાર કર્મચારીઓની ગેરહાજરીનો યુક્તિપૂર્વક ગેરલાભ ઉઠાવીને ચોપડા પર માલ રીસીવ થયો હોવાનું લખ્યું હતું. ખરેખર તો બેઉ ટ્રકમાં ભરાયેલું મીઠું ભચાઉના ચોપડવા નજીક આવેલી ખાનગી કંપનીમાં ખાલી કરવામાં આવ્યું હતું. ખાલી થયેલી ટ્રક કંડલા નક્ટી બ્રિજ પાસે હોવાનું જાણવા મળતાં બાલાજી ઈન્ફ્રાના સુપરવાઈઝર અને માલિક સ્થળ પર દોડી ગયેલાં. તેમણે ટ્રક ડ્રાઈવરની પૂછપરછ કરતાં સમગ્ર કાવતરાંનો પર્દાફાશ થયો હતો.

ભુજની સરસપર રોડવેઝ ટ્રાન્સપોર્ટ પેઢીના નરશીભાઈ અને દિગુભા નામના શખ્સોએ ટ્રકોના માલિક અલી અકબર લુહાર (રહે. ગાંધીધામ), બે ડ્રાઈવરો તથા સંઘડના રાહુલ રામજી મ્યાત્રા મારફતે તેના ગામના શામજી રાઠોડ સાથે મળીને, ટ્રકોમાં ભરેલું નમક કંડલા પોર્ટ મોકલવાના બદલે ચોરી કરીને, બારોબાર ભચાઉની કંપનીમાં વેચી મારવાનું કાવતરું રચ્યું હોવાનું ફરિયાદમાં લખાવાયું છે.

સૂત્રોના દાવા મુજબ ઉચ્ચ અધિકારીના ઈશારે પોલીસે તત્કાળ ગુનો દાખલ કર્યો નહોતો. જે અંગે કચ્છખબરે ગઈકાલે વિગતવાર અહેવાલ પ્રગટ કર્યો હતો.