જો દર્દીને સમયસર સારવાર ના મળે તો ઘણીવાર મૃત્યુ નીપજી શકે છે. સાપ કરડે ત્યારબાદ જ્યાં ડંખ વાગ્યો ત્યાં સોજો,  દુઃખાવો, તે ભાગ કાળો થઈ જવો, પાંપણ ઢળી પડવી, ધૂંધળું દેખાવું, શ્વાસમાં તકલીફ, પેશાબ લાલ આવવો, દાંત અને પેઢામાંથી લોહી પડવું, ચક્કર અને ઊંઘ આવવી વગેરે લક્ષણો જોવા મળી શકે છે. ઘણીવાર કિડની ઉપર પણ ઝેરની અસર થાય છે. 

સાપ કરડે અને દર્દીને હોસ્પિટલ પહોંચાડાય ત્યાં સુધી તેને ગભરાટ ન થાય તે રીતે શાંત પાડવો. કરડેલી જગ્યાને સાબુ અને પાણીથી ધોઈ નાખવી. તુરંત ૧૦૮ ઉપર કોલ કરીને નજીકની હોસ્પિટલમાં પહોંચવું. લક્ષણ ન હોય તો પણ ૨૪ કલાક દર્દીને તબીબી ઓબ્ઝર્વેશનમાં (અવલોકન)માં રાખવામાં આવે તે જરૂરી છે.

કેટલીકવાર લક્ષણો તુરંત દેખાતા નથી, પરંતુ અમુક કલાક પછી ગંભીર લક્ષણો વિકસે છે. તેથી ૨૪ કલાક હોસ્પિટલમાં તબીબની નજર હેઠળ અવલોકનમાં રહેવું જરૂરી છે.

આગોતરી સાવચેતી બાબતે તબીબોના જણાવ્યા મુજબ ખેતર કે બગીચામાં લાંબી બુટ અને લાંબી પેન્ટ પહેરવી, રાત્રે ટોર્ચ સાથે ચાલવું, આસપાસના ઝાંખરા, કચરો, પથ્થર દૂર રાખવા,  મચ્છરદાનીમાં સૂવું, ખોરાક ખુલ્લો રાખવો નહીં, સાપ દેખાય તો સલામત અંતરેથી સાપનો ફોટો લેવો જેથી તેની ઓળખ બાદ ઝેરની માત્રા કેવી છે તેનો અંદાજ તબીબોને સારવાર માટે મદદરૂપ બને છે.