કચ્છખબરડૉટકોમ, નલિયાઃ છેલ્લાં નવ દિવસથી પોતાની પાછળ હાથ ધોઈને પડી ગયેલાં અબડાસાના નાની વમોટી ગામના યુવક સામે પરિણીતાએ નલિયા પોલીસ મથકે છેડતી સહિતની કલમો તળે ફરિયાદ નોંધાવી છે. આરોપી કૃણાલ માધુભા જાડેજાએ ૩૧ ડિસેમ્બરે રસ્તામાં એકલી જતી યુવાન પરિણીતાએ અટકાવી તેનો મોબાઈલ નંબર લખેલી ચિઠ્ઠી બળજબરી પકડાવી પોતાની સાથે પ્રેમસંબંધ રાખવા જણાવ્યું હતું. યુવતીએ તેણે આપેલી ચિઠ્ઠી ત્યાં જ ફાડી નાખેલી. ઉશ્કેરાયેલાં કૃણાલે બીજા વખત યુવતીને આંતરી તેના પુત્ર અને પતિને મારી નાખવાની ધમકી આપેલી. કામસર બહારગામ ગયેલો પતિ ઘરે આવ્યો ત્યારે પરિણીતાએ તેને કૃણાલની હરકતો વિશે વાત કરેલી. પતિએ આરોપીને સમજાવવા પ્રયાસ કરેલો પરંતુ આરોપીએ પોતાને કોઈનો ડર ના હોવાનું જણાવી તેની પત્નીનો કેડો નહીં મૂકવાની અને થાય તે કરી લેજે કહી જાનથી મારી નાખવાની ધમકી આપી હતી.આરોપીને પકડીને કાયદાનો પાઠ ભણાવવા પોલીસે તજવીજ હાથ ધરી છે.
Share it on
|