પોતાના પિતરાઈ ભાઈ સહિત ગામના કેટલાંક યુવાનો મુંદરામાં મોટા કપાયામાં હોન્ડા શૉરૂમ પાછળ આવેલી જય દુર્ગા સિક્યોરીટી કંપનીમાં નોકરી કરતા હોઈ વિશાલ પણ દોઢ માસથી અહીં નોકરીએ લાગેલો.

પહેલી જાન્યુઆરી, ગુરુવારના રોજ વિશાલ એક્ટિવ કાર્ગો નામની પેઢીના પોઈન્ટ પર નોકરી પર હતો ત્યારે એક ટ્રક ડ્રાઈવરના ચાર હજાર રૂપિયાની ચોરી કરી હતી. જો કે, તે રંગેહાથ પકડાઈ ગયો હતો અને પોતાનો ગુનો કબૂલીને તેણે રૂપિયા પરત આપી દીધા હતા.

બનાવ અંગે જાણ થતાં કંપનીના ફિલ્ડ ઑફિસર દિનેશ નાથુલાલ મીણાએ વિશાલને નોકરી પરથી પરત તેના રૂમ પર બોલાવ્યો હતો. વિશાલ આવ્યા બાદ દિનેશે હાથમાં લાકડાનો મોટો ધોકો લઈને ચોરી બાબતે રૂમમાં તેની પૂછપરછ કરીને ધોકો ફટકારવાનું શરૂ કરેલું.

બનાવને નજરે જોનાર વિશાલના ગામના રામલખન અને પપ્પુલાલે જણાવ્યું કે દિનેશે વિશાલને માથામાં જોરદાર ધોકો ફટકારતાં લોહી નીકળવા માંડેલું. અમે હાથ વડે તેનું માથું દાબી દીધેલું. ત્યારબાદ પણ દિનેશે વિશાલને ધોકાથી ફટકાર્યે રાખ્યો હતો. માર ખાધા બાદ રાત્રે ૧૧ વાગ્યે વિશાલ રૂમમાં જઈને સૂઈ ગયો હતો.

શુક્રવારે સવારે છએક વાગ્યે સહકર્મીઓએ તેને ઉઠાડતાં તે ઉઠ્યો નહોતો. ૧૦૮ મારફતે તેને મુંદરાની સરકારી હોસ્પિટલમાં લઈ જવાયેલો. ફરજ પરના તબીબે તેને મૃત જાહેર કરેલો. બનાવ અંગે જાણ થતાં વિશાલના પિતા અને અન્ય સંબંધીઓ આજે સવારે મુંદરા દોડી આવ્યા હતા. વિશાલના માથા અને ડાબા કાન પાસે સૂકાઈ ગયેલું લોહી, બેઉ હાથ અને પગમાં મુઢ ઈજાના નિશાન તથા ડાબા હાથની આંગળીમાં ફ્રેક્ચર જોઈને વિશાલના પિતાએ રામલખનની પૂછપરછ કરતાં દિનેશ મીણાએ ધોકાથી માર મારીને વિશાલને મારી નાખ્યો હોવાનું બહાર આવ્યું હતું.

પોલીસની તપાસમાં બહાર આવ્યું છે કે આરોપી દિનેશ મૃતક વિશાલનો કૌટુંબિક કાકા થતો હતો અને વિશાલને આ કંપનીમાં તેણે જ નોકરી પર લગાડેલો.

મુંદરા પોલીસે દિનેશ મીણા સામે હત્યાની કલમો તળે ગુનો નોંધીને તેની અટક કરી લીધી છે. પોલીસ ઈન્સ્પેક્ટર આર.જે. ઠુંમર, પીએસઆઈ વી.એમ. ડામોર સહિતનો સ્ટાફ જરૂરી પંચનામા, પુરાવા એકઠાં કરવા સહિતની કામગીરીમાં પરોવાયો છે.