જો કે, હસન પાસે માંડ પચાસ હજાર રૂપિયા હતાં. ટોળકીએ તેને પચાસ હજાર સામે એક લાખ રૂપિયા મળવાનું ગાજર લટકાવીને ગાંધીધામ બોલાવ્યો હતો. હસન ટ્રેનમાં બેસીને ૨૫ મેની સવારે ગાંધીધામ આવ્યો હતો અને ગઠિયાઓનો સંપર્ક કરેલો.

હસને થેલીમાં રહેલા બંડલો બહાર કાઢી ચેક કરતાં ઉપર નીચે પાંચસો પાંચસોની અસલી નોટો અને વચ્ચે કોરાં કાગળોની થપ્પી રાખી હોવાનું બહાર આવ્યું હતું. દરમિયાન, હસનને નવસારી રહેતો તેનો મિત્ર આમીર ગુલમોહમ્મદ પઠાણ અહીં મળી ગયો હતો.

જો કે, અંજારનો અલી અસગર સુલેમાન શેખ અને અલ્તાફ ઈબ્રાહિમશા શેખ બેઉ આ રીતે લોકોને લલચાવીને બાટલીમાં ઉતારતાં હોવાની ખબર પડી જતાં તેણે રૂપિયા આપ્યાં નહોતાં. બનાવના પગલે બેઉ જણે સાથે જઈને ગાંધીધામ એ ડિવિઝન પોલીસ મથકમાં જાણ કરતા પોલીસે હસને આપેલી ફરિયાદ નોંધી તપાસ શરૂ કરી છે.

ભુજમાં ‘એક કા તીન’ના નામે લોકોને ઠગતી ટોળકીએ કોલકતાના યુવકનું દસ લાખ રૂપિયામાં ‘કરી’ નાખ્યું હોવાનો બનાવ બહાર આવ્યા બાદ, FIR નોંધી આરોપીઓને પકડી, રૂપિયા રીકવર કરવાના બદલે પોલીસ દ્વારા ચીટરોનો બારોબાર કોન્ટેક્ટ કરી યુવકને રૂપિયા પરત અપાવી દઈ મામલો રફેદફે કરી દેવાની ઘટનાએ પોલીસ તંત્ર અને કાયદાની આલમમાં ભારે ચકચાર સર્જી છે.

આ બનાવથી આવી મોડસ ઓપરેન્ડીથી ચીટીંગ કરતાં રીઢા અપરાધીઓ બેફામ બનવાની ચિંતા સેવાઈ રહી છે. ઉલ્લેખનીય છે કે, ભૂતકાળમાં સસ્તાં સોના કે એક કા તીનની મોડસ ઓપરેન્ડીથી લાખો કરોડો રૂપિયાની ઠગાઈનો ભોગ બનનારાં દેશના ખૂણે ખૂણે વસતાં અનેક લોકોની ફોજદારી ફરિયાદો દાખલ કરી, આરોપીઓને ન્યાયની અદાલતમાં રજૂ કરીને, શક્ય તેટલી મહત્તમ રકમ રીકવર કરીને પોલીસે કાયદાસંમત કાર્યવાહી કરેલી છે.