અબ્બાસ મોખાની સ્વિફ્ટ કાર કિડાણાના સુલતાન ગની છુછીયા પાસે ગીરવે રાખીને તેના મિત્રો સની દનિચા અને અઝીઝ સમાએ રૂપિયા મેળવ્યાં હતા. થોડાંક સમય બાદ અબ્બાસને ગાડીની જરૂર ઊભી થતાં રૂપિયા પરત અપાવવાની જવાબદારી લઈને તે સુલતાન પાસેથી ગાડી લઈ આવ્યો હતો.

જેથી શનિવારે સુલતાને અબ્બાસના કુટુંબી ભાઈ મુસ્તાક ઊર્ફે પટેલ મમણને ફોન કરીને પોતાને અબ્બાસનું કામ હોવાનું જણાવી તેને મળવા માંગતો હોવાનું કહી તેને સાથે લઈ આવી મળાવી દેવા જણાવ્યું હતું. મુસ્તાકે જાણ કરતાં અબ્બાસ મુસ્તાક તથા તેના બે મિત્રોને સાથે રાખી રીજન્ટા હોટેલ સર્કલ ખાતે સુલતાનને મળવા આવ્યો હતો.

નંબર પ્લેટ વગરની થાર કારમાં પોતાના ભાઈ આરીફ અને મિત્ર ફરીદ રહીમ જામ સાથે આવેલા સુલતાને અબ્બાસને માર મારી થારમાં પરાણે બેસાડી અપહરણ કરી લઈ ગયો હતો. મુસ્તાક વચ્ચે પડ્યો તો તેને ધારિયું બતાડી મારી નાખવાની ધમકી આપેલી.

ગાંધીધામ પીઆઈ એસ.વી. ગોજીયા અને તેમની ટીમે નાકાબંધી કરીને થારમાં અબ્બાસનું અપહરણ કરીને આવી રહેલા સુલતાન અને તેના ભાઈ તથા સાગરીતને ઝડપી પાડી અબ્બાસને હેમખેમ મુક્ત કરાવ્યો હતો.

પોલીસે જણાવ્યું કે સુલતાન રીઢો આરોપી છે. ૨૦૨૨માં તેના પર રૂપિયાની વસૂલાત હેતુ ફરિયાદીને ગોંધી રાખવા સબબ આદિપુરમાં તથા ૨૦૨૪માં ખંડણીના હેતુથી મારી નાખવાનો ભય બતાડવા અને ગેરાકાયદે વ્યાજખોરી સબબ ગાંધીધામ બી ડિવિઝન પોલીસ મથકમાં ગુના દાખલ થયેલા છે. ગત એપ્રિલ માસમાં ગાંધીધામ બી ડિવિઝન પોલીસે સુલતાને છુછીયાએ સરકારી જમીન પર પેશકદમી કરીને ચણી નાખેલી ૧૦ દુકાનો અને સર્વિસ સ્ટેશન પર બુલડોઝર ફેરવી નાખ્યું હતું.