ગઈકાલે ભુજની આહીરપટ્ટીના ધાણેટી પંથકમાં ચેકીંગ કરવા ગયેલી ટાસ્ક ફોર્સે તેની રેકી કરી રહેલી કાળા રંગની સેલ્ટોસ કારને જ ઝડપી પાડવા પ્રયાસ કર્યો હતો.

આ કારનો નંબર GJ-39 CC- 6164 હતો. જેના માલિક તરીકે નિરાલી વાસણભાઈ છાંગાનું નામ ચોપડે નોંધાયેલું છે. આરટીઓએ આ કારચાલક સામે મોટર વેહિકલ એક્ટની વિવિધ કલમો તળે કાર્યવાહી હાથ ધરી છે. ટાસ્ક ફોર્સની આ કામગીરીથી ખનિજ માફિયાઓમાં ફફડાટ ફેલાયો છે.

દરમિયાન, ટાસ્ક ફોર્સે ગેરકાયદે ચાઈના ક્લે ભરીને મમુઆરા તરફ જતાં બે ડમ્પર અને તેમાં ભરેલી પચાસ ટન ચાઈના ક્લે જપ્ત કરી બંને ડમ્પર પધ્ધર પોલીસ મથકે સુપ્રત કરીને બંનેના ડ્રાઈવર તથા માલિકો વિરુધ્ધ કાયદેસર કાર્યવાહી હાથ ધરી છે. ઝડપાયેલાં ડમ્પરમાં GJ-12 CT-8425 (ડ્રાઈવર સમીર જામ અને માલિક હરિ ભગુ ઢીલા, ડગાળા) અને GJ-12 CT-4888 (ડ્રાઈવર નીરુ બારચટ અને માલિક સંજય જાટીયા, મમુઆરા)નો સમાવેશ થાય છે.

ખનિજ માફિયાઓ ખનિજ વિભાગ અને ટાસ્ક ફોર્સથી બચવા માટે લાંબા સમયથી તેમની ગતિવિધિની જાસૂસી કરી રહ્યાં છે. માફિયાઓના માણસો સતત સરકારી ટીમની ગાડીઓ પર વૉચ રાખી રેકી કરે છે. ભુજ અંજારની સરકારી કચેરીમાંથી નીકળતી ટીમની ગાડીઓ જે વિસ્તાર તરફ રવાના થાય તેનો પીછો કરીને તે વિસ્તારના લોકોને સાવચેત થઈ જવાનો આગોતરો સંદેશ પાઠવી દેવાય છે.

ઘણીવાર કચેરીના માણસોને પણ ફોડી નાખીને માહિતી મેળવતાં રહે છે. મહત્વની સરકારી કચેરીઓમાં પડ્યાં પાથર્યાં રહેતા ભુજની પત્રકાર ગંઢેચા ગેંગના માણસો પણ ખનિજ માફિયાઓ અને સરકારી તંત્રો વચ્ચે ડબલ ગેમ રમે છે.