ફરિયાદમાં ચેતને પોલીસને જણાવ્યું કે થોડાંક સમય અગાઉ તેણે મોબાઈલ ફોનમાં ઈન્સ્ટોલ કરેલી એપ મારફતે શુક્રવારે ઉમેશ પટેલ નામના ભુજના યુવકે તેનો સંપર્ક કરેલો. રાત્રે ઉમેશે તેને મળવા બોલાવતા તે ભુજની ડોલર હોટેલ પાસે તેને મળવા ગયેલો.

ફરિયાદી અને ઉમેશ નિર્જન વિસ્તારમાં જઈને વાતો કરતા હતા ત્યાં અચાનક બે જણ આવેલાં. ‘થોડાંક સમય અગાઉ અહીં અમારી વાડીમાંથી વાયર ચોરી થયેલી અને તમે જ લોકોએ વાયર ચોરી કરી છે’ કહીને બેઉ જણ ફરિયાદીને માર મારવા માંડેલાં. ઉમેશ પણ તેમની સાથે ભળી જઈને ફરિયાદીને માર મારવા માંડેલો.

ત્રિપુટીએ તેને વાયર ચોરીના ગુનાની ફરિયાદમાં ફીટ કરાવી દેવાની ધમકી આપીને વીસ હજાર રૂપિયાની માંગણી કરેલી. ફરિયાદીએ તેના સાળાનો સંપર્ક કરીને ગુગલ પે મારફતે પાંચ હજાર રૂપિયાની વ્યવસ્થા કરેલી.

દરમિયાન, ગભરાટમાં ફરિયાદીને ચક્કર આવતાં તે નીચે પડી ગયેલો. જેથી આ ત્રિપુટી તેને બાઈક પર તેના ઘર નજીક ઉતારી ગયેલી અને બાકીના પંદર હજાર રૂપિયાનો મેળ કરી લેવા ધમકી આપતી ગયેલી.

બીજા દિવસે ઉમેશ પટેલે ફરિયાદીને વારંવાર ફોન કરીને રૂપિયાની માંગણી કરતા ડરી ગયેલા ફરિયાદીએ તેના સાળાને સમગ્ર ઘટનાની વાત કરેલી. મામલો પોલીસ મથકે પહોંચેલો.

માનકૂવા પોલીસે ત્રિપુટી સામે ગુનાહિત કાવતરું ઘડીને, ફરિયાદીને એકાંતમાં મળવાના નામે બોલાવીને, ચોરીના ખોટાં ગુનામાં ફસાવી દેવાની ધમકી આપી, મારપીટ કરી, બળજબરીથી પાંચ હજાર રૂપિયા કઢાવી લઈને અને બાકીના રુપિયા માટે અવારનવાર વોટસએપ કૉલ કરી ધમકીઓ આપવાના આરોપ કલમો હેઠળ ગુનો નોંધીને રશિદ સમા અને અબ્દુલ નોડેની ધરપકડ કરી લીધી છે.