ગત ૧૪-૦૯-૨૦૨૩ના રોજ LCBએ ભુજમાં કચ્છ હાઈવે ટ્રાન્સપોર્ટ પેઢીમાં આવેલી કથિત ૧.૮૪ લાખની કિંમતનો હર્બલ સિરપનો જથ્થો ઈકો કારમાં ભરીને નખત્રાણા તરફ જતાં વિક્રમસિંહ રાઠોડને ઝડપ્યો હતો.

પોલીસે ૪૦૦ એમએલની એક એવી આસવાસવ બ્રાન્ડની ૪૯ અને ૩૭૫ એમએલની એક એવી કાલ મેઘાસવ અરિષ્ટા બ્રાન્ડની ૧૧૯૦ બાટલીઓ જપ્ત કરી હતી. CrPC ૧૦૨ હેઠળ શક પડતાં મુદ્દામાલ તરીકે બાટલીઓ, કાર વગેરે જપ્ત કરી અને ૪૧ ૧ ડી હેઠળ આરોપીની અટક કરાઈ હતી.

પોલીસે જપ્ત કરેલી સિરપની બાટલીઓના સેમ્પલ રાજકોટ ફોરેન્સિક સાયન્સ લેબોરેટરીમાં પરીક્ષણ માટે મોકલી આપ્યાં હતાં. એફએસએલના રીપોર્ટમાં બહાર આવ્યું છે કે બંને સિરપમાં આઈસોપ્રોપાઈલ આલ્કોહોલની હાજરી છે અને તેનું પ્રમાણ પંદર ટકા જેટલું છે. સામાન્ય રીતે બિયરમાં આલ્કોહોલનું પ્રમાણ સરેરાશ સાતથી આઠ ટકા હોય છે.

એફએસએલનો રીપોર્ટ સ્પષ્ટ દર્શાવે છે કે આ પીણાંનું ઉત્પાદન અને ઉપયોગ નશા માટે જ થતો હતો. સામાન્ય રીતે, દારૂમાં ઈથાઈલ આલ્કોહોલ હોય છે જે મોલાસીસ, જવ વગેરે જેવા કુદરતી ખાદ્યપદાર્થોમાં આથો આવ્યાં બાદ તેમાંથી નિષ્યંદિત કરાતો હોય છે. ઈથાઈલ આલ્કોહોલ નશો કરવા હેતુ માનવ ઉપયોગ માટે વપરાય છે પરંતુ આઈસોપ્રોપાઈલ આલ્કોહોલ રાસાયણિક પ્રક્રિયાથી ઉત્પાદિત થતો હોય છે અને ઈથાઈલ આલ્કોહોલ કરતાં તેનું રાસાયણિક બંધારણ જુદું છે.

આ ગુનામાં પોલીસે પ્રોહિબિશન એક્ટની કલમ ૬૭ (૧), ૯૮ (૨) અને ૮૧ મુજબ ત્રણે આરોપી સામે ગુનો નોંધ્યો છે. જો કે, પોલીસે સિરપની ઉત્પાદક કંપનીઓ સામે કોઈ ગુનો નોંધ્યો નથી.