મણકાએ પ્રાથમિક આરોગ્ય કેન્દ્રની કંપાઉન્ડ વૉલ તોડી પીએમ રૂમ, પાણીના ટાંકા, ગેટ, બગીચો વગેરેમાં તોડફોડ કરી ચાર દુકાનોનું બાંધકામ કરીને પાછળની બાજુ ફાઉન્ડેશન બનાવીને સરકારી જમીન પર ગેરકાયદે પેશકદમી જાળવી રાખી હોવાનું ફરિયાદમાં નોંધાવાયું હતું.

વિશેષ પબ્લિક પ્રોસિક્યુટર કે.સી. ગોસ્વામીએ આરોપી સામે ૨૦૧૯, ૨૦૨૨ અને ૨૦૨૩માં દાખલ થયેલી ચાર જેટલી વિવિધ ફોજદારી ફરિયાદને ટાંકીને તે ગુનાહિત ઈતિહાસ ધરાવતો હોવાનું જણાવી જામીન અરજી ફગાવી દેવા રજૂઆત કરી હતી. બચાવ પક્ષે જમીન તેમની માલિકીનું હોવાના દસ્તાવેજ રજૂ કરી, હાઈકૉર્ટ અને સ્થાનિક કૉર્ટે આપેલા સ્ટે વગેરેના મુદ્દા ટાંકી જામીન આપવા રજૂઆત કરી હતી.

આઠમા અધિક સેશન્સ જજ એસ.એમ. કાનાબારે રજૂ થયેલાં દસ્તાવેજો ઝીણવટપૂર્વક તપાસી જણાવ્યું હતું કે અરજદાર તરફે  આકારણી નંબર ૫/૯૪વાળી જમીન બાબતે રજીસ્ટર્ડ સેલ ડીડ રજૂ થયેલ છે. તે મુજબ આકારણી નંબર ૫/૯૪વાળી જમીન તા. ૧૩-૧૨-૨૦૦૦ના રોજ કોલી ભીખા રાયધણ પાસેથી પ્રકાશકુમાર અરવિંદ ઠક્કર અને અન્યને વેચાણ કરેલ હોવાની હકીકત જણાય છે. જેમાં તે જમીનનું કુલ ક્ષેત્રફળ ૧૮૩.૦૫ ચો.મી. દર્શાવેલ છે. ત્યારબાદ પ્રકાશકુમાર ઠક્કર અને અન્ય તરફથી ૨૮-૧૧-૨૦૨૨ના રોજ વેચાણ દસ્તાવેજથી તે જમીન અરજદાર/ આરોપીને વેચાણ કરવામાં આવેલી જેમાં તેનું ક્ષેત્રફળ ૧૮૩.૦૫ ચો.મી. દર્શાવવામાં આવ્યું છે.

આ સંજોગમાં આકારણી નંબર ૫/૯૪ રાજેશ મણકાએ ખરીદી ત્યારબાદ પુત્રના નામે ફરી વેચાણ દસ્તાવેજ બનાવ્યો તેમાં ચોરસ મીટરના ક્ષેત્રફળ જે જણાવાયા છે તેનાથી વધુ ક્ષેત્રફળ જણાવાયું છે, તેને ધ્યાને લેતાં અન્ય જમીન ઉપર આરોપીએ ગેરકાયદેસર અને બિનઅધિકૃત કબજો દબાણ કરેલું હોવાનું પ્રથમદર્શનીય રીતે જણાઈ આવે છે.

અરજદારે ભચાઉ સિવિલ કૉર્ટમાં દાખલ કરેલા દિવાની દાવા અંતર્ગત મનાઈ હુકમ મેળવેલો. આ મનાઈ હુકમ ૫/૯૪વાળી મિલકત બાબતે અપાયેલો, જ્યાં આરોગ્ય કેન્દ્ર બન્યું છે તે ૫/૯૬ બાબતે સ્ટે નથી.

આ અંગે રજૂ થયેલ નોટીસ, કલેક્ટર દ્વારા લેન્ડગ્રેબિંગ એક્ટ અન્વયે રચવામાં આવેલી સમિતિનો રીપોર્ટ તેમજ રજૂ થયેલા ફોટોગ્રાફને ધ્યાને લેતાં આરોપીએ સરકારી જમીનમાં દબાણ કર્યું હોવાનું પ્રથમદર્શનીય રીતે જણાઈ આવે છે. આરોપી ગુનાહિત ઈતિહાસ ધરાવે છે. સરકારી મિલકતમાં ગેરકાયદે બળજબરીપૂર્વક બાંધકામ કર્યું હોવાનું જણાઈ આવે છે. ગુનાની તપાસ નાજૂક તબક્કે છે. આરોપીને જામીન પર છોડાય તો ફરિયાદ પક્ષના સાક્ષીઓને નુકસાન પહોંચાડે તેવી શક્યતા નજરઅંદાજ કરી શકાય તેમ નથી.