લખનૌ NIAએ બેઉ આરોપી સામે ઈપીકો કલમ ૧૨૦-બી, ૧૨૩ અને યુએપીએ એક્ટની કલમ ૧૮ હેઠળ ગુનો નોંધ્યો હતો.

૧૯-૦૧-૨૦૨૦ના રોજ ઉત્તર પ્રદેશના ગોમતીનગર (લખનૌ)ની એન્ટી ટેરરીસ્ટ સ્ક્વૉડે વારાણસીમાંથી ૨૩ વર્ષિય મોહમ્મદ રાશિદ ઈદ્રીશ નામના ISI એજન્ટની ધરપકડ કરેલી. મૂળ ચંદૌલી (યુપી)ના મુગલસરાઈના વતની રાશિદે ભારતીય સુરક્ષા દળોની મૂવમેન્ટ અને સંરક્ષણની દ્રષ્ટિએ અત્યંત વ્યૂહાત્મક તથા સંવેદનશીલ ઘણાં સ્થળોના ફોટોગ્રાફ પાકિસ્તાનસ્થિત ISI એજન્ટોને મોકલ્યાં હતાં.

તેણે વારાણસીના વિવિધ ઘાટ, મહત્વના મંદિરો, રેલવે સ્ટેશન, લખનૌના વિવિધ વ્યૂહાત્મક સ્થળો, મિર્ઝાપુર અને સોનભદ્ર જેવા નક્સલાઈટ એરીયામાં આવેલા CRPF કેમ્પ વગેરેની સંવેદનશીલ માહિતી અને ફોટોગ્રાફ વોટસએપ મારફતે સામે પાર શૅર કર્યાં હતા. ધોરણ આઠ પાસ રાશિદ ફોનથી અવારનવાર સામે પાર સંપર્કમાં રહેતો હોઈ એજન્સીઓના સર્વેલન્સમાં આવી ગયો હતો.

ઘટનાની ગંભીરતા જોતાં ૦૬-૦૪-૨૦૨૦ના રોજ કેસની તપાસ NIAને સુપ્રત કરાઈ હતી. NIAએ નવેસરથી ગુનો નોંધીને તપાસ કરતાં સ્પષ્ટ થયું હતું કે જૂલાઈ ૨૦૧૯માં રાશિદના ખાતામાં પેટીએમ મારફતે પાંચ હજાર રૂપિયા જમા થયા હતા. NIAએ તે સમયે જાહેર કરેલું કે ISIની સૂચનાના પગલે રજાક કુંભારે પેટીએમ મારફતે રીઝવાન નામના શખ્સના ખાતામાં 5 હજાર રૂપિયા જમા કરાવ્યા હતા. આ નાણાં રીઝવાને રાશિદને આપ્યા હતા.

આ ગુનામાં માર્ચ માસમાં રાશિદને કૉર્ટે ૬ વર્ષની કેદની સજા ફટકારી હતી અને હવે રજાકને પણ ૬ વર્ષની સખ્ત કેદ ભોગવવાનો વારો આવ્યો છે.